ភ្នំពេញ៖ អ្នកវិនិយោគ និងជាម្ចាស់ក្រុមហ៊ុនធំៗមកពីសហរដ្ឋអាម៉េរិក ចិន និងនៅកម្ពុជា នៅថ្ងៃទី ២៤ ខែកុម្ភៈនេះ បានជួបប្រជុំគ្នា នៅក្នុងទីក្រុងភ្នំពេញរបស់ប្រទេសកម្ពុជា ដើម្បីសិក្សាស្វែងយល់ពីឱកាសវិនិយោគក្នុងប្រទេសកម្ពុជា។ពិធីនេះរៀបចំឡើង នៅសណ្ឋាគារ Sun and Moon ក្រោមការសហការរវាងឧកញ្ញា ស៊ ធីតា និង ស្ថាប័នAREAA Global អន្តរជាតិ។
តំណាងអ្នកវិនិយោគអាម៉េរិកដឹកនាំដោយលោក Allen Chiang ប្រធាន AREAA Global និង ជាស្ថាបនិកក្រុមហ៊ុន Presidential Real Estate លោកស្រី Carmen Chong នាយកប្រតិបត្តិ AREAA Global និង ជាប្រធានក្រុមហ៊ុន CC Legacy Financial Corporation ព្រមទាំងអ្នកវិនិយោគជាច្រើនរូបទៀត។
លោក អ៉ិន មាន ទីប្រឹក្សា AREAA Global ប្រចាំនៅកម្ពុជា បានថ្លែងថា កម្មវិធីរៀបចំឡើងក្រោមប្រធានបទ "ស្វែងយល់ពីកម្ពុជា" (UpClose Cambodia) ទៅដល់ក្រុមអ្នកវិនិយោគជាតិ និង អន្តរជាតិ ដើម្បីផ្តល់ជូនដល់ក្រុមអ្នកវិនិយោគយល់កាន់តែច្បាស់ពីសក្កានុពលរបស់ប្រទេសកម្ពុជាទាំង ភូមិសាស្ត្រ ហេដ្ឋារចនាសម្ព័ន្ធនានា និង ច្បាប់វិនិយោគ។សម្រាប់លោក អ៉ិន មាន ការមកដល់របស់អ្នកវិនិយោគអន្តរជាតិធំៗមកកម្ពុជាពេលនេះ គឺជាភាពជោគជ័យ ក្រោយលោកជាមួយក្រុមការងារព្យាយាមអស់ជាច្រើនឆ្នាំទាក់ទងពួកគេ។
គួរបញ្ជាក់ថា ស្ថាប័ន AREAA Global មានស្នាក់ការកណ្តាលរបស់ខ្លួនក្នុងទឹកដីសហរដ្ឋអាម៉េរិក គឺជាស្ថាប័នមួយមានសមារជិកភាគច្រើនជាម្ចាស់ក្រុមហ៊ុនធំនៅចិន អាម៉េរិក និងនៅក្នុងតំបន់អាស៊ី។បច្ចុប្បន្នសមាជិកសរុបចំនួនជិត២ម៉ឺននាក់ ចែកចេញជា៥១ជាតិសាស្ត្រ អាចនិយាយចំនួន២៦ភាសារ។
ថ្លែងក្នុងសន្និសីទសារព័ត៌មាន ក្រុមអ្នកវិនិយោគអន្តរជាតិ បានបង្ហាញសប្បាយរីករាយពេលមកដល់ប្រទេសកម្ពុជា។សម្រាប់អ្នកវិនិយោគយល់ថា កម្ពុជាមាន សន្តិសុខ សុវត្តិភាព និង បរិស្ថានល្អ ខុសពីការផ្សព្វផ្សាយមួយចំនួន ហើយជាពិសេសជាងនេះទៅទៀតនោះ គឺប្រជាជនកម្ពុជាមានភាពរាកទាក់ល្អគួរជាទីគោរពស្រឡាញ់ដូចពាក្យមួយថា «ប្រទេសតូចតែបេះដូងធំ»។
ក្រោយចប់កម្មវិធី "ស្វែងយល់ពីកម្ពុជា" លោក អ៉ិន មានរំពឹងថា ក្រុមអ្នកវិនិយោគទាំងអស់នឹងកាន់តែទំនុកចិត្តពីការវិនិយោគនៅប្រទេសកម្ពុជា ជាពិសេសវិស័យអចលនទ្រព្យ ដែលមានបរិយាកាសអំណោយផលជាច្រើនទាំងកត្តាធម្មជាតិ កត្តាភូមិសាស្ត្រ និង កត្តានយោបាយ ហើយកម្មវិធីនេះក៏បានណែនាំអំពីច្បាប់ ប្រព័ន្ធពន្ធដារ និងភាពងាយស្រួលនៃការផ្ទេរប្រាក់ ដែលត្រូវបានបង្ហាញ ដោយអ្នកជំនាញក្នុងស្រុកមកពីស្ថាប័នផ្សេងៗ៕
