![](https://cdn.cc-times.com/kh.cc-times.com/media/44661/large/photo_2024-02-16_00-00-09.jpg?1708568311)
ព្រះសីហនុ៖ សាលាដំបូងខេត្តព្រះសីហនុ បានសម្រេចកាត់ទោស បុរសជនជាតិចិនម្នាក់ជាប់ពន្ធនាគារ ក្រោយជនជាតិចិនរូបនេះ បានបើករថយន្តទំនើបក្នុងល្បឿនលឿនគេចចេញពីគោលដៅត្រួតពិនិត្យរបស់សមត្ថកិច្ចហើយបានបង្ក ឲ្យកើតមានគ្រោះថ្នាក់ចរាចរណ៍ បណ្តាលឲ្យមានមនុស្ស និង របួស។
ជនជាតិចិនដែលតុលាការកម្ពុជាកាត់ទោសនោះមានឈ្មោះ DOU SHIPING ភេទប្រុស អាយុ២៧ឆ្នាំ កាលពីថ្ងៃទី ១៥ ខែកុម្ភៈ បានបើករថយន្តទំនើប ម៉ាក FORDMUSTANG ពណ៌លឿង ពាក់ផ្លាកលេខ ភ្នំពេញ 2BP-8967 ព្យាយាមបើករត់គេចពីប៉ារាំស់គោលដៅត្រួតពិនិត្យនោះក្នុងល្បឿនលឿន មានទិសដៅពី លិច ទៅកើតទើបភា្លមៗនោះកម្លាំងសមត្ថកិច្ចបានជិះប្រដេញតាម រហូតដល់ ស្រុកព្រៃនប់ ខេត្តព្រះសីហនុ ជនសង្ស័យក៏បានផ្លាស់ ប្តូរទិសដៅរថយន្តបត់ឆ្វេង ហើយបានបុកម៉ូតូបណ្តាលឱ្យអ្នកបើកបរម៉ូតូស្លាប់ និង អ្នករួមដំណើរ ០២នាក់ រងរបួសស្រាល។ រីឯជនសង្ស័យឈ្មោះ DOU SHIPING ត្រូវបានសមត្ថកិច្ចធ្វើការឃាត់ខ្លួន។
ក្រោយចាប់ខ្លួនតំណាងអយ្យការ បានពិនិត្យសំណុំរឿងទាំងពីរខាងលើ និងបានស្ដាប់ចម្លើយជនសង្ស័យ ព្រមទាំងពិនិត្យភស្តុតាងជារួមរួចមក អយ្យការអមសាលាដំបូងខេត្តព្រះសីហនុ សម្រេចបើកការចោទប្រកាន់លើជនសង្ស័យជាជនជាតិចិនរូបនេះ ពីបទ បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្នបណ្តាលឱ្យរបួស និង ស្លាប់ដល់អ្នកដទៃ តាមបញ្ញត្តិមាត្រា ៨៣ និងមាត្រា ៨៥ ចំណុច ក នៃច្បាប់ស្តីពីចរាចរណ៍ផ្លូវគោក។
![](https://cdn.cc-times.com/kh.cc-times.com/media/44662/large/photo_2024-02-15_23-56-37.jpg?1708568320)
យោងតាមច្បាប់ ជនណាដែលបើកបរធ្វេសប្រហែស ខ្ជីខ្ជា ឬមិនប្រុងប្រយ័ត្ន ធ្វើឲ្យអ្នកដទៃមានរបួស ហើយជនរងគ្រោះ អសមត្ថភាពធ្វើការ ស្មើ ឬលើសពី៨ថ្ងៃ គិតពីថ្ងៃកើតហេតុ ត្រូវដាក់ពន្ធនាគារពី៦ខែ ទៅ ២ឆ្នាំ និងពិន័យជាប្រាក់ពី ២លានរៀល ទៅ ១០លានរៀល។ នេះបើតាមមាត្រា៨៣ នៃច្បាប់ចរាចរណ៍ផ្លូវគោក។ មាត្រាដដែល ឲ្យដឹងទៀតថា ជនប្រព្រឹត្តនឹងត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ៣ឆ្នាំ និងពិន័យជាប្រាក់ពី ៤លានរៀល ទៅ១៥លានរៀល បើអ្នកជនល្មើសស្ថិតក្នុងស្ថានភាពស្រវឹង បើកបរដោយគ្មានបណ្ណបើកបរ ឬមានបណ្ណបើកបរតែមិនត្រូវតាមប្រភេទយានយន្ដ ធ្វើឲ្យមានរបួសមនុស្សច្រើននាក់ ហើយរត់គេចខ្លួនពីកន្លែងកើតហេតុជាដើម៕
![](https://cdn.cc-times.com/kh.cc-times.com/media/44663/large/photo_2024-02-15_23-56-29.jpg?1708568332)