គម្រោង«ស្ថាបនាផ្លូវជាតិលេខ១០»ពីកោះកុង-បាត់ដំបងសម្រេចបានជាង៧៧%

ភ្នំពេញ៖គម្រោងស្ថាបនាផ្លូវជាតិលេខ១០ ដែលលាតសន្ធឹងពីខេត្តកោះកុង ពោធិ៍សាត់ ដល់ខេត្តបាត់ដំបង គិតមកដល់ថ្ងៃទី ១៧ កុម្ភៈនេះ សម្រេចការសាងសង់បានជាង៧៧ភាគរយហើយ។នេះបើតាមលោក ផន រឹម អ្នកនាំពាក្យក្រសួងក្រសួងសាធារណការ និង ដឹកជញ្ជូន។

លោក ផន រឹម បានថ្លែងពីមោទកភាពមិនអាចកាត់ថ្លៃបាន នៃគម្រោងស្ថាបនាផ្លូវជាតិ លេខ១០ (កោះកុង,ពោធិ៍សាត់, បាត់ដំបង)ប្រវែងសរុប ១៩៨,៥១៨ គ.ម សម្រេចបាន ៧៧,៨១% នៃគម្រោងទាំងមូល ខណៈដែលស្ពានខ្ពស់ប្រវែង ៥៣០ម៉ែត្រ ត្រង់គ.ម ១២៨+៩០៥ សម្រេចបាន ៣៩,០០%។

បើតាមមន្ត្រីអ្នកនាំពាក្យរូបនេះ គម្រោងស្ថាបនាផ្លូវជាតិលេខ១០ បានដំណើរការចាប់ផ្តើមចាក់កៅស៊ូពីខាងខេត្តកោះកុង ឆ្ពោះទៅកាន់រង្វង់មូលប្រមោយស្រុកវាលវែង ខេត្តពោធិ៍សាត់។លោកថា គម្រោងរយៈពេលសាងសង់ៈ៤៨ ខែ+១៨ខែ=៦៦ខែ(ចាប់ផ្តើមថ្ងៃទី១៨ខែធ្នូឆ្នាំ២០១៩) បញ្ចប់ខែមិថុនា ២០២៥ ខណៈប្រភេទផ្លូវៈ Grade III, ក្រាលកៅស៊ូពីរស្រទាប់ (DBST),ប្រវែងផ្លូវ :១៩៨,៥១៨គម, ទទឹង: ៩ម៉ែត្រ។

គួរបញ្ជាក់ថា  គម្រោងស្ថាបនាផ្លូវជាតិលេខ១០នេះ មានប្រវែងជាង១៩៧គីឡូម៉ែត្រ លាតសន្ធឹងពីស្រុកសំឡូត ខេត្តបាត់ដំបង រហូតដល់ស្រុកវាលវែង និងឃុំអូរសោម ខេត្តពោធិ៍សាត់និងខេត្តកោះកុង។ ផ្លូវជាតិមួយខ្សែនេះ មានទទឹងតួផ្លូវ៩ម៉ែត្រ ជាប្រភេទផ្លូវកៅស៊ូ២ស្រទាប់ (DBST) ដែលសាងសង់ឱ្យមានស្ពានចំនួន២៨កន្លែង សរុបប្រវែង ​១ ៧២១,៤៦ម៉ែត្រ និងមានស្ពានខ្ពស់ជាងគេមួយកម្ពស់៧៥ម៉ែត្រ បណ្តោយ៥៣០ម៉ែត្រ និងទទឹង១០ម៉ែត្រ ក៏ដូចជាមានបំពាក់ ផ្លាកសញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ និងបង្គោលសុវត្ថិភាពផងដែរ៕