សៀមរាប៖ លោក Chifumi Krohom គឺជាវិចិត្រកររបស់ប្រទេសបារាំងម្នាក់ដែលបានរៀបចំរចនាបង្កើតជា«គំនូររំលេចនូវរចនាប័ទ្មវប្បធម៌ខ្មែរ» លើជញ្ជាំងមន្ទីរពេទ្យគន្ធបុប្ផា។ ស្នាដៃសិល្បៈនេះ បានទាក់ទាញការចាប់អារម្មណ៍ជាខ្លាងដល់សាធារណជន ជាពិសេស ប្រជាពលរដ្ឋកម្ពុជាតាមបណ្តាញសង្គម។
លោក Chifumi Krohom បានមករស់នៅក្នុងប្រទេសកម្ពុជា តាំងពីឆ្នាំ ២០១៣។ត្បិតជាជនជាតិបារំាង តែក្នុងការងារសិល្បៈរបស់លោកចាប់អារម្មណ៍លើការបំផុសគំនិតកើតចេញពីប្រវត្តិវប្បធម៌ដ៏សម្បូរបែបរបស់ប្រទេសកម្ពុជា ដូចជា គម្រោងបង្កើតស្នាដៃ «សិល្បៈព្រះព្រហ្ម» បំផុសគំនិតពីចម្លាក់សម័យអង្គរនៅមន្ទីរពេទ្យគន្ធបុប្ផាបច្ចុប្បន្ន។
គំនូរនៅមន្ទីរពេទ្យគន្ធបុប្ផា និង តាមផ្លូវទៅប្រាសាទអង្គរវត្ត គឺរៀបចំឡើងក្នុងការរំលេចនូវរចនាប័ទ្មវប្បធម៌ជាតិកម្ពុជាដែលតម្រូវឱ្យធ្វើការបន្តរយៈពេល ៣ សប្តាហ៍ដោយមិនឈប់សម្រាក ១ ថ្ងៃ ក្នុងគោលបំណងប្រាថ្នាដ៏មុតមាំក្នុងការបង្កើតអ្វីមួយដែលឆ្លើយតបនឹងសហគមន៍មូលដ្ឋាន និង បន្ថែមអត្តសញ្ញាណរបស់មន្ទីរពេទ្យគន្ធបុប្ផាក្នុងខេត្តសៀមរាប។នេះបើតាមការលើកឡើងរបស់លោក Chifumi Krohom។
បើតាមលោក Chifumi Krohom ផ្ទាំងគំនូរនេះមិនត្រឹមតែលើកកម្ពស់សោភណ្ឌភាពទីក្រុងប៉ុណ្ណោះទេ ប៉ុន្ដែថែមទាំងដើរតួជាផ្លូវវប្បធម៌ ដោយរាល់រចនាប័ទ្មទាំងអស់កើតចេញពីទម្រង់វប្បធម៌ខ្មែរ ជាពិសេស គឺកើតឡើងនៅក្នុងទីតាំងក្រុងនៃខេត្តសៀមរាប និង តំបន់ប្រាសាទបុរាណរបស់កម្ពុជា។
គួរបញ្ជាក់ថា ការជ្រើសរើសយកគំនូរព្រះព្រហ្មនៅមន្ទីរពេទ្យគន្ធបុប្ផា និងគំនូរផ្សេងទៀត ដោយវិចិត្រករបារាំងរូបនេះ យល់ថាមន្ទីរពេទ្យគន្ធបុប្ផា គឺជាមជ្ឈមណ្ឌលសម្ភពដ៏ធំបំផុតមួយនៅក្នុងប្រទេស។ ដើម្បីរក្សាភាពអរូបីមួយចំនួននៅក្នុងការរចនានេះ លោកបានរួមបញ្ចូលនូវលម្អ ក្បាច់ភ្ញីទេស តំណាងឱ្យរុក្ខជាតិរីកដុះដាល និង សម្បូរបែបដែលបានរកឃើញនៅជុំវិញប្រាសាទខ្មែរ ដែលទទួលបានការកោតសរសើរពីសំណាក់សាធារណជន៕
