កោះកុង៖ គម្រោងសាងសង់ជាច្រើនក្នុង«អាកាសយានដ្ឋានអន្តរជាតិតារាសាគរ»ក្នុងខេត្តកោះកុង ត្រូវបានជាប់គាំង និង ផ្អាកដំណើរជាបន្តបន្ទាប់។ការជាប់គាំងនេះ ដោយសារតែវិបត្តិវិស័យហិរញ្ញវត្ថុ ក្រោយក្រុមហ៊ុនវិនិយោគព្រលានយន្តហោះអន្តរជាតិនេះ សហរដ្ឋអាម៉េរិក នៅថ្ងៃទី១៥ ខែកញ្ញា ឆ្នាំ២០២០ បានដាក់បញ្ចូលក្នុងបញ្ជីខ្មៅ។
យោងតាមរបាយការណ៍ពីវឌ្ឍនភាព«អាកាសយានដ្ឋានអន្តរជាតិតារាសាគរ» គិតមកត្រឹមថ្ងៃទី៣ ខែកុម្ភៈ ឆ្នាំ២០២៤ ការដ្ឋានសាងសង់នៅអាកាសយានដ្ឋានអន្តរជាតិតារាសាគរនៅបន្ត ប៉ុន្តែពុំមានការ ប្រែប្រួលគួរអោយកត់សំគាល់ឡើយ ពោលគឺក្នុងដំណើរការសាងសង់ រប៉េះរប៉ស់មានកម្មករចំនួនតិចតួច។
បើតាមប្រភពពីតំណាងក្រុមហ៊ុន បច្ចុប្បន្ននេះក្រុមហ៊ុនកំពុងជួបបញ្ហាខាងវិស័យហិរញ្ញវត្ថុ ហើយវិបត្តិនេះបាននាំឱ្យគម្រោងសាងសង់ជាច្រើនត្រូវបានជាប់គាំងមិនដំណើរការសាងសង់របស់ខ្លួន។បច្ចុប្បន្ននេះ ថ្នាក់ដឹកនាំក្រុមហ៊ុន និង ក្រុមការងាររបស់ក្រុមហ៊ុនបានត្រឡប់ទៅចិនវិញ ក្រោមហេតុផងថាដោយសារត្រូវវិស្សមកាល ក្នុងឱកាសចូលឆ្នាំចិន។
គួររំលឹកដែរថា អាកាសយានដ្ឋាន តារាសាគរ ស្ថិតក្នុងស្រុកបុទមសាគរ ខេត្តកោះកុង ជាការវិនិយោគដោយក្រុមហ៊ុនចិន Union Development Group ។នៅថ្ងៃទី១៥ ខែកញ្ញា ឆ្នាំ២០២០ អាម៉េរិក បានសម្រេចដាក់បញ្ចូលក្រុមហ៊ុននេះក្នុងបញ្ជីខ្មៅរបស់ខ្លួន ក្រោមហេតុផលថា រំលោភសិទ្ធិមនុស្ស តាមរយៈបង្ខំឲ្យប្រជាជនកម្ពុជាចាកចេញពីដីធ្លីរបស់ពួកគេ និង បានបំផ្លិចបំផ្លាញបរិស្ថាន នាំឲ្យប៉ះពាល់ដល់ការប្រកបរបរចិញ្ចឹមជីវិតរបស់សហគមន៍មូលដ្ឋាន។
តែយ៉ាងណាក៏ដោយ ក្រុមហ៊ុនទទួលសិទ្ធិវិនិយោគ បានជំទាស់យ៉ាងខ្លាំងទៅនឹងការសម្រេចដាក់ទណ្ឌកម្មរបស់ក្រសួងសេដ្ឋកិច្ចអាម៉េរិក ដោយចាត់ទុកថា ការចោទប្រកាន់ទាំងអម្បាម៉ាន គឺជាការមិនអើពើនឹងការពិត ហើយប្រឌិតរឿងតែមាត់។ក្រុមហ៊ុន អះអាង វិធានការនេះ ជាការគៀបសង្កត់របស់រដ្ឋាភិបាលអាម៉េរិកទៅលើការវិនិយោគស្របច្បាប់របស់សហគ្រាសចិននៅកម្ពុជា ហើយជាការរំលោភបំពានទាំងស្រុងលើអធិបតេយ្យភាពរបស់ប្រទេសកម្ពុជា៕
