ផ្សារទំនើបធំៗមួយចំនួនទទួលទិញ«ផលិតផល»ពីកសិករនៃអាជីវកម្មខ្នាតតូច

ភ្នំពេញ៖ ផ្សារទំនើបធំៗមួយចំនួនដូចជា ផ្សារម៉ាក្រូ ផ្សារអាហារសុវត្ថិភាពខេ.ស៊ី.ស៊ី.វី ផ្សារក្រុមហ៊ុន Yamato Green និង ទីផ្សារកសិផលដទៃទៀត បានទទួលទិញ«ផលិតផល»របស់ក្រុមកសិករនៃអាជីវកម្មខ្នាតតូច (AIMS) រួមមាន មាន់ស្រែ ដំឡូងមី បន្លែ ស្រូវ និងសូតឆៅ។

បើតាមរបាយការណ៍របស់ក្រសួងពាណិជ្ជកម្ម ក្រសួងបានអនុវត្តគម្រោងជំរុញទីផ្សារសម្រាប់កសិកម្មខ្នាតតូច (AIMS) ដោយសម្រេចបានការចងក្រងជាចង្កោមអាជីវកម្មចំនួន ៧៩៨ ចង្កោម ក្រុមកសិករផលិតមានចំនួន ១៩០៨ ក្រុម ដែលមានសមាជិកសរុបចំនួន ៧៨ ២៧៦ គ្រួសារ ដែលផលិត មាន់ស្រែ ដំឡូងមី បន្លែ ស្រូវ និងសូតឆៅ។ ជាលទ្ធផលមានទីផ្សារធំៗមួយចំនួនដូចជាផ្សារម៉ា ផ្សារអាហារសុវត្ថិភាពខេ.ស៊ី.ស៊ី.វី ផ្សារក្រុមហ៊ុនYamato Green និងទីផ្សារកសិផលដទៃទៀតបានទទួលទិញផលិតផលរបស់ក្រុមកសិករទាំងនោះ។

ក្រសួងពាណិជ្ជកម្ម ដើម្បីជួយជំរុញសេដ្ឋកិច្ចមូលដ្ឋានបន្ថែមទៀត ក្រសួងពាណិជ្ជកម្ម បានចុះអនុស្សរណៈនៃការយោគយល់គ្នាជាមួយក្រុមហ៊ុន ស៊ីភី ខេមបូឌា ដើម្បីជួយប្រមូលទិញពោតក្រហមប្រមាណ ២៥ម៉ឺនតោន ដំឡូងមី ១៥ម៉ឺនតោន ស្រូវ ២ម៉ឺនតោន កន្ទក់ ៥ម៉ឺនតោន និងកល្ហុងអង្ករ ១០ម៉ឺនតោន ក្នុងមួយឆ្នាំ ពីប្រជាកសិករ៕