កែប៖ រដ្ឋបាលខេត្តកែប នឹងរៀបចំឲ្យមានព្រឹត្តិការណ៍កំសាន្តសប្បាយជាច្រើនដូចជាកម្មវិធី បង្ហើរខ្លែង អុំទូកផ្កាចារ សមុទ្រ រួមជាមួយនឹងការប្រគុំតន្ត្រី អុជកាំជ្រួច និងបង្ហោះគោម ដើម្បីអបអរសាទរព្រឹត្តិការណ៍ឆ្លងឆ្នាំសកល ឆ្នាំ២០២៣ ឆ្លងចូលឆ្នាំ២០២៤ និង អបអរសាទរខួបលើកទី៤៥ នៃទិវាបុណ្យជាតិជ័យជំនះ ៧ មករា (៧ មករា ១៩៧៩ - ៧ មករា ២០២៤)។
រដ្ឋបាលខេត្តកែប នឹងរៀបចំឲ្យមានព្រឹត្តិការណ៍កំសាន្តសប្បាយជាច្រើនដូចជាកម្មវិធី ទៅតាមពេលវេលាដូចជា៖ ១. ពិធីបង្ហើរខ្លែងខ្មែរ + នៅថ្ងៃទី៣០ ខែធ្នូ ឆ្នាំ២០២៣ វេលាម៉ោង ៧:៣០នាទីព្រឹក ស្ថិតនៅឆ្នេរថ្មី ផ្សារក្តាមខេត្តកែប។ ២.ពិធីអុំទូកផ្កាចារសមុទ - នៅថ្ងៃទី៣១ ខែធ្នូ ឆ្នាំ២០២៣ វេលាម៉ោង ៧:៣០នាទីព្រឹក ស្ថិតនៅ ឆ្នេរលេងទឹកខេត្ត។ ៣.ប្រគុំតន្ត្រី អុជកាំជ្រួច និងបង្ហោះគោម + នៅថ្ងៃទី៣១ ខែធ្នូ ឆ្នាំ២០២៣ វេលាម៉ោង ៧:០០ នាទីយប់ រហូតដល់ម៉ោង ១២:០០ រំលងអាធ្រាតឈានចូលថ្ងៃទី០១ ខែមករា ឆ្នាំ២០២៤។
រដ្ឋបាលខេត្ត នឹងរៀបចំពិធីបង្ហើរខ្លែងខ្មែរប្រចាំឆ្នាំ ដែលនឹងប្រព្រឹត្តទៅនៅថ្ងៃទី ៣០ ខែធ្នូ ឆ្នាំ២០២៣ វេលាម៉ោង ៧:៣០នាទីព្រឹក ស្ថិតនៅឆ្នេរថ្មីផ្សារក្តាមខេត្តកែប។ ការរៀបចំពិធីបង្ហើរខ្លែងខ្មែរនេះ មានគោលបំណងរួមចំណែកថែរក្សា ប្រពៃណី វប្បធម៌ ទំនៀមទម្លាប់ ដ៏ល្អផូរផង់របស់ជាតិយើង និងជំរុញលើក កម្ពស់វិស័យទេសចរណ៍ខេត្ត ក៏ដូចជាបង្កការសប្បាយរីករាយ ជូនដល់ភ្ញៀវទេសចរជាតិ និងអន្តរជាតិ ដែលមក សម្រាកលម្ភៃ កំសាន្តក្នុងខេត្តកែប។
ជាមួយគ្នានេះ រដ្ឋបាលខេត្តកែបបញ្ជាក់ថា ដើម្បីញ៉ាំងឲ្យកម្មវិធីនេះ ប្រព្រឹត្តិទៅមានភាពអធិកអធម និងសប្បាយរីករាយ សាធារណជនទាំងអស់ ដែលស្រឡាញ់ ចូលចិត្ត និងអ្នកមានទេពកោសល្យធ្វើខ្លែងខ្មែរ អាចយកខ្លែងមកចូលរួមបង្ហើរឲ្យបានច្រើនកុះករ តាមពេលវេលា និងទីកន្លែងដូចបានជម្រាបជូនខាងលើ៕
