.png?1741682398)
ខេត្តព្រះសីហនុ៖ បើគ្មានការប្រែប្រួលទេ នាវា Westerdam នឹងចូលចតកំពង់ផែក្រុងព្រះសីហនុនៅថ្ងៃ២៨ធ្នូ២០២៣ ហើយមានអ្នកទេសចរចំរុះជាតិសាសន៍រហូតដល់ទៅជិត៤០០០នាក់ មកតាមនាវានេះដើម្បីទស្សនាប្រទេសកម្ពុជា។ នេះបើតាមការបញ្ជាក់ពីមន្ត្រីរដ្ឋបាលខេត្តព្រះសីហនុ។
កាលពីអំឡុងផ្ទុះជំងឺកូវីដ១៩កាលពីឆ្នាំ២០២០ នាវា Westerdam នេះត្រូវបានប្រមុខរាជរដ្ឋាភិបាលកម្ពុជា អនុញ្ញាតឲ្យចូលចតនៅកំពង់ផែក្រុងព្រះសីហនុ ដើម្បីជួយសង្គ្រោះអ្នកទេសចរចំរុះជាតិសាសន៍រាប់ពាន់អ្នកដែលជាប់នៅលើនាវានេះ បន្ទាប់ពីប្រទេសមួយចំនួនបដិសេធមិនឲ្យចូលចត ក្រោមហេតុផលខ្លាចចម្លងមេរោគកូវីដ១៩។
ក្រោយការចូលចតដល់កំពង់ផែក្រុងព្រះសីហនុកាលពីពេលនោះ អ្នកទេសចរនៅលើនាវានេះបានរីករាយរហូតខ្លះទៀតស្រក់ទឹកភ្នែក ជាមួយនឹងការរំភើបដឹងគុណដល់សម្តេច ហ៊ុន សែន ដែលកាលនោះ សម្តេចនៅជានាយករដ្ឋមន្ត្រីនៃរាជរដ្ឋាភិបាលកម្ពុជា ដែលអនុញ្ញាតឲ្យនាវានេះបានចូលចតក្នុងប្រទេសកម្ពុជា និងសម្រួលដំណើរបន្តតាមជើងយន្តហោះ បានទៅកាន់ប្រទេសរៀងៗខ្លួន ធ្វើឲ្យកិត្យានុភាពប្រទេសកម្ពុជាល្បីល្បាញលើពិភពលោកជាប់ឈ្មោះជាប្រទេសតូចតែបេះដូងមនុស្សធម៍ធំ។
បើតាមមន្ត្រីរដ្ឋបាលខេត្តព្រះសីហនុឲ្យដឹងបន្ថែមថា អាជ្ញាធរនិងផ្នែកពាក់ពន្ធ័បានត្រៀមបំរុងកិច្ចការជាច្រើន សម្រាប់ការវិលត្រឡប់ចូលមកចតជាថ្មីម្តងទៀតរបស់នាវានេះនៅកំពង់ផែក្រុងព្រះសីហនុ៕
