ភ្នំពេញ៖ ក្រសួងពាណិជ្ជកម្ម នឹងរៀបចំពិព័រណ៍ផលិតផលខ្មែរ និងទំនិញនាំចេញ-នាំចូល លើកទី១៦ ដែលចាប់ផ្ដើមពីថ្ងៃទី១៥-១៨ ខែធ្នូ ឆ្នាំ២០២៣ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ដែលជាព្រឹត្តិការណ៍ពិព័រណ៍ពាណិជ្ជកម្មដ៏ធំប្រចាំឆ្នាំកម្រិតអន្តរជាតិ។
ការរៀបចំពិព័រណ៍នេះ បានរៀបចំឡើងក្នុងគោលបំណងលើកកម្ពស់សកម្មភាពពាណិជ្ជកម្ម និងវិនិយោគនៅកម្ពុជា ជាពិសេសដើម្បីជំរុញការតភ្ជាប់ទំនាក់ទំនងពាណិជ្ជកម្មរវាងកម្ពុជា និងសហគមន៍អន្តរជាតិ។ នៅក្នុងព្រឹត្តិការណ៍ពិព័រណ៍នេះ ក្រសួងពាណិជ្ជកម្មក៏នឹងរៀបចំកម្មវិធីអមសំខាន់ៗមួយចំនួនដូចជា សិក្ខាសាលាស្តីពីការជំរុញពាណិជ្ជកម្ម, វេទិកាធុរកិច្ច និងវិនិយោគ, កម្មវិធីចុះអនុស្សរណៈយោគយល់លើកិច្ចការពាណិជ្ជកម្ម, កម្មវិធីជំនួបពាណិជ្ជកម្ម និងការប្រគំតន្ត្រីផងដែរ។
គួរបញ្ជាក់ថា នៅក្នុងផែនការយុទ្ធសាស្ត្រអភិវឌ្ឍន៍វិស័យពាណិជ្ជកម្មរបស់ ក្រសួងពាណិជ្ជកម្ម បានដាក់បញ្ចូលសកម្មភាពពិព័រណ៍ផលិតផលខ្មែរ និងទំនិញនាំចេញ-នាំចូលកម្រិតអន្តរជាតិនេះ ជារបៀបវារៈអាទិភាពមួយ ក្នុងការចាប់យកឱកាសទីផ្សារ ជំរុញការនាំចេញផលិតផល និងសេវា និងការតភ្ជាប់ទំនាក់ទំនងសេដ្ឋកិច្ចរវាងកម្ពុជា ជាមួយអន្តរជាតិ៕
