.png?1741682398)
ភ្នំពេញ៖ ខេត្តកំពង់ឆ្នាំង និងកំពង់ធំ នឹងតភ្ជាប់គ្នាដោយស្ពានវែងជាងគេនៅកម្ពុជា ជាមួយផ្លូវជាតិលេខ៥០-C ហើយគម្រោងនេះមានការសិក្សាប្រើរយៈពេលយូរ មុនសម្រេចឱ្យសាងសង់ គឺដោយសាររដ្ឋាភិបាលបារម្ភពីការប៉ះពាល់ដល់បរិស្ថាន ជាពិសេសត្រីនៅក្នុងទន្លេសាប។នេះបើតាមសម្តេច ហ៊ុន ម៉ាណែត នាយករដ្ឋមន្ត្រីនៃកម្ពុជា។
ថ្លែងក្នុងពិធីសម្ពោធកំណាត់ផ្លូវជាតិលេខ៥ ព្រែកក្តាមដល់ខេត្តបាត់ដំបង និង បើកការដ្ឋានសាងសង់ផ្លូវជាតិលេខ៥ ពីសិរីសោភ័ណ ដល់ប៉ោយប៉ែត ខេត្តបន្ទាយមានជ័យសម្តេច ហ៊ុន ម៉ាណែត បានអះអាងថា កម្ពុជានឹងមានស្ពានវែងជាងគេ ដែលមានប្រវែងជាង ៣ គីឡូម៉ែត្រ កាត់ពីលើទន្លេសាប ស្ពាននោះគឺតភ្ជាប់ពីបឹងទន្លេសាបខេត្តកំពង់ឆ្នាំង និង ខេត្តកំពង់ធំ។
បើតាមសម្តេច ហ៊ុន ម៉ាណែត ជាមួយការសាងសង់ស្ពានវែងជាងគេ រាជរដ្ឋាភិបាលកម្ពុជានឹងសាងសង់ ផ្លូវជាតិលេខ៥០-C តភ្ជាប់រវាងខេត្តកំពង់ឆ្នាំង និងកំពង់ធំ ។គម្រោងធំៗនេះ គឺរាជរដ្ឋាភិបាលកំពុងសិក្សា ហើយ មានការសិក្សាប្រើរយៈពេលយូរ មុនសម្រេចឱ្យសាងសង់ គឺដោយសាររដ្ឋាភិបាលបារម្ភពីការប៉ះពាល់ដល់បរិស្ថាន ជាពិសេសត្រីនៅក្នុងទន្លេសាប។
គួរបញ្ជាក់ថា សម្តេច ហ៊ុន សែន អតីតនាយករដ្ឋមន្ត្រីនៃកម្ពុជា ធ្លាប់បានបង្គាប់ឲ្យភាគីដែលពាក់ព័ន្ធ ដូចជា ក្រសួងសាធារណការ និងដឹកជញ្ជូន,ក្រសួងបរិស្ថាន,ក្រសួងដែនដីនគរូបនីយកម្ម និងសំណង់,ក្រសួងធនធានទឹក និងឧតុនិយម,ក្រសួងកសិកម្មរុក្ខប្រមាញ់ និងនេសាទ និងអាជ្ញាធរខេត្តទាំងពីរ រួមសហការគ្នាសិក្សាយ៉ាងលម្អិតហើយថាមិនមានផលប៉ះពាល់ណាមួយដល់ធនធានធម្មជាតិ បញ្ហាបង្វែរចរន្តទឹក និង ការបំលាស់ទីរបស់ត្រីនោះទេ។
សម្រាប់រាជរដ្ឋាភិបាល គម្រោងសាងសង់ស្ពានវែងជាងគេនេះ ត្រូវឆ្លងកាត់ដៃទន្លេចំនួនបី គឺទន្លេផ្សារក្រោម ទន្លេជល់មុខ និងទន្លេកំពង់ហាវ ពីខេត្តកំពង់ឆ្នាំ ឆ្ពោះទៅខេត្តកំពង់ធំហើយ គម្រោងនេះប្រជាពលរដ្ឋនឹងទទួលបានផលប្រយោជន៍យ៉ាងច្រើនចំណេញទាំងពេលវេលា ចំណេញថ្លៃដឹកជញ្ជូន និង ទទួលបានចំណូលកាន់តែច្រើនជាមិនខាន។
បច្ចុប្បន្ន ស្ពានដែលវែងជាងគេនៅកម្ពុជា គឺស្ពាន «ត្សឹបាសា» ឬស្ពាន «អ្នកលឿង» ដែលមានប្រវែង២២១៥ម៉ែត្រ ស្ថិតក្នុងខេត្តព្រៃវែង និងឆ្លងកាត់ទន្លេមេគង្គ។ ស្ពាននេះ ត្រូវបានដាក់ឲ្យប្រើប្រាស់ជាផ្លូវការកាលពីដើមខែមេសា ឆ្នាំ២០១៥៕
