នាវាពីរគ្រឿងដឹកភ្ញៀវទេសចរបរទេសជិត៣ពាន់នាក់មកទស្សនាកម្ពុជា

ព្រះសីហនុ៖ នាវាទេសចរណ៍ចំនួនពីរគ្រឿង បានដឹកភ្ញៀវទេសចរបរទេសជិត៣ពាន់នាក់ ចូលចតនៅក្រុងព្រះសីហនុចំនួន២ថ្ងៃ ចាប់ពីថ្ងៃទី១៧វិច្ឆិកា-១៨វិច្ឆិកា ឆ្នាំ២០២៣នេះ ដើម្បីទស្សនាសក្តានុពលទេសចរណ៍ឆ្នេរ ផ្សារលើ វត្តលើ វត្តក្រោមជាដើម។នេះបើយោងតាមរបាយការណ៍ពីក្រសួងទេសចរណ៍កម្ពុជា។

នាវាទេសចរណ៍ទាំង២នោះមាន នាវាទេសចរណ៍ឈ្មោះ AIDA BELLA សញ្ជាតិ ITALY មកពីប្រទេសសិង្ហបុរី ផ្ទុកភ្ញៀវទេសចរ សរុប ២០០៥ នាក់ ស្រី ១០៤៨ មាន នាវិក ៦៣១ នាក់ ស្រី១២២ នាក់ ។ នាវានេះ បានចូលមកកម្ពុជា ថ្ងៃទី១៧ ខែវិច្ឆិកា ឆ្នាំ២០២៣។

នាវាទេសចរណ៍មួយទៀតឈ្មោះ NORWEGIAN JEWEL សញ្ជាតិ BAHAMAS មកពីប្រទេសវៀតណាមផ្ទុកភ្ញៀវទេសចរ សរុប ១៨០៣នាក់ ស្រី ១០៤៨ មាននាវិកសរុប ១០៤០នាក់ ស្រី២៣០នាក់។ នាវានេះបានចូលមកកម្ពុជានៅថ្ងៃទី១៨ ខែ វិច្ឆិកា ឆ្នាំ២០២៣។

ការមកដល់នៃនាវាទេសចរណ៍បរទេសទាំង២នេះ ជាសញ្ញាល្អថ្មីទៀតនៃវិស័យទេសចរណ៍របស់កម្ពុជា ក្រោយវិបត្តិជំងឺកូវីដ១៩ ហើយការមកដល់នេះ គឺទទួលបានសម្របសម្រួលទទួលបដិសណ្ឋារកិច្ច ប្រកបដោយភាពកក់ក្តៅ ពីអាជ្ញាធរខេត្ត និងមន្ត្រីជំនាញពាក់ព័ន្ធ៕