កីឡាករកាយវប្បកម្ម សំបូរ សុភ័ណ្ឌ ឈ្នះមេដាយ ២គ្រឿង ក្នុងការប្រកួត PCA Elite Classic

ភ្នំពេញ៖ កីឡាករកាយវប្បកម្ម សំបូរ សុភ័ណ្ឌ នៅថ្ងៃទី ១២ វិច្ចកា បានឈ្នះមេដាយចំនួន ២គ្រឿង មានមេដាយមាស ១គ្រឿង និងមេដាយប្រាក់ ១គ្រឿង ពីការប្រកួតជើងឯកកាយវប្បកម្ម PCA Elite Classic ប្រទេសថៃ។

កីឡាករកាយវប្បកម្ម សំបូរ សុភ័ណ្ឌ បានឈ្នះមេដាយចំនួន ២គ្រឿង លើប្រភេទ ២ វិញ្ញាសារ ដែលរួមមានមេដាយមាស ១គ្រឿង ក្នុងវិញ្ញាសារ Classic Physique Open និងមេដាយប្រាក់ ១គ្រឿង ក្នុងវិញ្ញាសារ Men Physique Open ពីការប្រកួតជើងឯកកាយវប្បកម្ម PCA Elite Classic នៅថៃ ហើយនេះជាការប្រជែងលើឆាកអន្តរជាតិជាថ្មីម្ដងទៀតផងដែរ។ កីឡាករកាយវប្បកម្មរូបនេះ ក៏បានលើកឡើងថា «ការឈ្នះមេដាយទាំងពីរគ្រឿងនេះមិនមែនជាមេដាយរបស់គាត់តែម្នាក់នោះទេ គឺជាមេដាយរបស់ពុកម៉ែបងប្អូនកម្ពុជាយើងទាំងមូល»។

គួរបញ្ជាក់ថា កីឡាករកាយវប្បកម្ម សំបូរ សុភ័ណ្ឌ បានចេញដំណើរទៅចូលរួមក្នុងការប្រកួតនៅទីក្រុងផាតាយ៉ា ប្រទេសថៃ កាលពីថ្ងៃទី ១០ ខែវិច្ចកា ឆ្នាំ២០២៣ ដើម្បីប្រកួតតំណាងប្រទេសកម្ពុជា ក្នុងកម្មវិធី PCA Elite Classic ក្នុង២ប្រភេទវិញ្ញាសារ គឺ Classic Physique Open និង Men Physique Open៕