ភ្នំពេញ៖ នៅថ្ងៃទី ៩ វិច្ឆិកា ឆ្នាំ២០២៣ស្អែកនេះ គឺជាខួបលើកទី៧០ដែលប្រទេសកម្ពុជាទាំងមូលទទួលបានឯករាជ្យពីប្រទេសបារាំង ក្រោមព្រះរាជកិច្ច និង ជាស្នាដៃព្រះមហាវីរៈក្សត្រ គឺព្រះបាទ នរោត្តមសីហនុ។បច្ចុប្បន្នរាជរដ្ឋាភិបាលកម្ពុជា កំពុងតែមមាញឹកក្នុងការរៀបចំពិធីក្រោយព្រះរាជធិបតីរបស់ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។
(០៩ វិច្ឆិកា ១៩៥៣ ~ ០៩ វិច្ឆិកា ២០២៣) គឺជាខួប៧០ឆ្នាំនៃទិវាបុណ្យឯករាជ្យជាតិ ដែលកម្ពុជាបានទាមទារឯករាជ្យពីប្រទេសបារាំងបានពេញលេញ ក្រោមការដឹកនាំដោយព្រះបាទសម្ដេចព្រះនរោត្តមសីហនុ។ពិធីធ្វើឡើង ដើម្បីរំលឹកខួបជារៀងរាល់ឆ្នាំ រំលឹកដល់ស្មារតីកងទ័ពជាតិកម្ពុជា ក៏ដូចជាការរំលឹកដល់ស្នាដៃព្រះមហាវីរៈក្សត្រ គឺព្រះបាទ នរោត្តមសីហនុ ដែលបានទាមទារឯករាជ្យភាពកម្ពុជាពីប្រទេសបារាំង នៅថ្ងៃទី ៩ ខែវិច្ឆិកា ឆ្នាំ ១៩៥៣។
ដើម្បីអបអរសាទរពិធីដ៏មានអត្ថន័យសម្រាប់ជាតិនេះ បច្ចុប្បន្ននេះរាជរដ្ឋាភិបាលកម្ពុជាបានត្រៀមរៀបចំ និង ការហាត់សមគ្រប់ផែនទាំងផែនមហាជន យុវជន កងទ័ព ព្រមទាំងចងនូវបដា រូបព្រះឆាយាលក្ខណ៍ និង ព្រះរាជសកម្មភាពរបស់ស្នាដៃព្រះមហាវីរៈក្សត្រ គឺព្រះបាទ នរោត្តមសីហនុផងដែរ។
គួរបញ្ជាក់ថា បារាំងបានចាប់ផ្ដើមដាក់អាណានិគមលើប្រទេសកម្ពុជា ក្នុងឆ្នាំ១៨៦៣ ដល់ឆ្នាំ១៩៥៣។ នៅក្នុងព្រះរាជបេសកកម្មពេលនោះ សម្ដេចព្រះនរោត្តម សីហនុ ទ្រង់បានលះបង់ព្រះកាយពល និង ព្រះបញ្ញាញាណ យ៉ាងខ្លាំងតស៊ូក្នុងក្របខណ្ឌ នៃព្រះរាជបូជនីយកិច្ច ដើម្បីទាមទារឯករាជ្យឱ្យប្រទេសកម្ពុជា រួចផុតពីនឹមអាណានិគមនិយមបារាំង៕
