ភ្នំពេញ៖សាលា និង សាកលវិទ្យល័យ ប៊ែលធី អន្តរជាតិដែលជាសាលារៀនឯកជន បានចេញសេចក្តីនាំដល់ដល់គ្រប់ទីតាំងសាលា និង សាកលវិទ្យាល័យរបស់ខ្លួននៅទូទាំងប្រទេសត្រូវយកចិត្តទុកដាក់លើកកម្ពស់សុវត្តិភាព ចំណីអាហារ និង ការលក់ចំណីអាហារខ្មែរក្នុងសាលារៀនរបស់ខ្លួន។សេចក្តីជូនដំណឹងនេះ ក្នុងគោលបំណងលើកកម្ពស់ដល់ចំណីអាហាររបស់ខ្មែរ។
យោងតាមសេចក្តីណែនាំ ចេញផ្សាយនៅថ្ងៃទី ៤ តុលានេះ ក្រុមហ៊ុន ប៊ែលធី គ្រុប បានណែនាំដល់លោកនាយកសាខា និង សាកលវិទ្យាធិការរង នៅគ្រប់ទីតាំងអស់ត្រូវយកចិត្តទុកដាក់ឱ្យបានខ្ពស់ និង ត្រួតពិនិត្យឱ្យបានហ្មត់ចត់រាល់ចំណីអាហារដែលមានលក់នៅតាមសាខារបស់ខ្លួន ជាពិសេសអាហារហួសកំណត់កាលបរិច្ឆេទ គ្រឿងស្រវឹង ថ្នាំជក់ ភេសជ្ជៈប៉ូវកម្លាំង ភេសជ្ជៈផ្អែមខ្លាំង កាហ្វេ ការ៉េម ទឹកស៊ីរ៉ូប៍ ជាដើម។
ដើម្បីចូលរួមជាមួយក្រសួងអប់រំ ដើម្បីលើកកម្ពស់ដល់ចំណីអាហាររបស់ខ្មែរ សាលាឯកជននេះ បានណែនាំដល់សាខាទាំងអស់ជំរុញលក់ចំណីអាហារខ្មែរជូនដល់សិស្ស-និស្សិតឱ្យបានផុសផុល និងចូលរួមផ្សព្វផ្សាយចំណីអាហារខ្មែរ ដើម្បីចូលរួមគាំទ្រផលិតខ្មែរ។
គួរបញ្ជាក់ថា សម្ដេច ហ៊ុន ម៉ាណែត អំពាវនាវឱ្យអាជីវករលក់ដូរក្នុងសាលារៀន គិតគូរពីសុវត្ថិភាពកុមារ និង សិស្ស ហើយ បានស្នើឱ្យអាជីវករទាំងនោះ មិនត្រូវយកចំណីអាហារ ដែលមានផលប៉ះពាល់ដល់សុខភាពកុមារ និង សិស្សនោះ មកដាក់លក់ឱ្យពួកគេឡើយ។សម្ដេច ថ្លែងបែបនេះ នៅពិធីប្រារព្ធគ្រូបង្រៀនលើកទី២៦ ថ្ងៃ៥តុលា ក្រោមប្រធានបទ «គ្រូបង្រៀន ជាសសរស្តម្ភ នៃកំណែទម្រង់សាលារៀនឆ្ពោះទៅរកឧត្តមភាព» នៅវិទ្យាស្ថានបច្ចេកវិទ្យាកម្ពុជា៕
.jpg?1696484031)
