ភ្នំពេញ៖ រាជបណ្ឌិត្យសភាកម្ពុជា នៅថ្ងៃទី ២៥ កញ្ញានេះ បានប្រកាសដាក់សម្ពោធជាផ្លូវការនូវ«វចនានុក្រមខ្មែរឆ្នាំ២០២២»ដែលមានពាក្យសរុប ៤ ៤៦៩៦ពាក្យ និង មេពាក្យចំនួន ៣១ ០៧៣ពាក្យ។«វចនានុក្រមខ្មែរ»ថ្មីនេះ មិនត្រឹមតែបោះពុម្ពជាសៀវភៅប៉ុណ្ណោះទេ វចនានុក្រមនេះក៏មានដាក់ឱ្យប្រើប្រាស់រតាមប្រព័ន្ធឌីជីថល អាចទាញយកបាននៅលើទូរសព្ទ និងកុំព្យូទ័រផងដែរ។
ពិធីដាក់សម្ពោធឱ្យប្រើប្រាស់ជាផ្លូវការនេះ ធ្វើឡើងក្រោមអធិបតីភាព លោក វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកស្តីទីការគណៈរដ្ឋមន្ត្រី លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា ប្រធានក្រុមប្រឹក្សាជាតិភាសាខ្មែរ និង ភាគីពាក់ព័ន្ធជាច្រើនទៀត។
បើតាមរាជបណ្ឌិត្យសភាកម្ពុជា វចនានុក្រមថ្មីនេះ មានការបូកបញ្ចូលនូវពាក្យថ្មីៗជាច្រើន ស្របតាមការប្រើប្រាស់របស់ប្រជាជនកម្ពុជាបច្ចុប្បន្ន ក្នុងនោះមានពាក្យសរុប ៤ ៤៦៩៦ពាក្យ និងមេពាក្យចំនួន ៣១ ០៧៣ពាក្យ។ មិនត្រឹមតែបោះពុម្ពជាសៀវភៅប៉ុណ្ណោះទេ វចនានុក្រមនេះក៏មានដាក់ឱ្យប្រើប្រាស់រតាមប្រព័ន្ធឌីជីថល អាចទាញយកបាននៅលើទូរសព្ទ និងកុំព្យូទ័រផងដែរ។ វចនានុក្រមនេះបានបូកបញ្ចូលពាក្យបច្ចេកទេស និង ពាក្យថ្មីៗជាច្រើនស្របតាមតម្រូវការបច្ចុប្បន្ន។
វចនានុក្រមខ្មែរឆ្នាំ២០២២នេះ ត្រូវបានរៀបរៀងដោយក្រុមប្រឹក្សាជាតិភាសាខ្មែរ ដោយមានការចូលរួមពីអ្នកជំនាញ និង ភាគីពាក់ព័ន្ធផ្សេងទៀត ដើម្បីឱ្យការបង្កើតពាក្យនីមួយៗត្រឹមត្រូវ ស្របតាមស្តង់ដាដែលអាចឱ្យប្រជាជនខ្មែរយកទៅប្រើប្រាស់បាន។
បើតាមប្រធានក្រុមប្រឹក្សាជាតិភាសាខ្មែរ លោក ហ៊ាន សុខុម បានឱ្យដឹងថា ដំណើរការធ្វើបច្ចុប្បន្នភាពវចនានុក្រមនេះ គឺយកវចនានុក្រមខ្មែរ របស់សម្តេចព្រះសង្ឃរាជ ជួន ណាត ជាគោល ហើយយកពាក្យទាំងអស់ដាក់បញ្ចូលមកវិញ ដោយមិនបោះបង់ពាក្យណាឡើយ គ្រាន់តែកែពាក្យមួយចំនួន និងបន្ថែមពាក្យថ្មីមួយចំនួន៕
