ភ្នំពេញ៖ លោក ញ៉ែម សំអឿន អភិបាលខេត្តរតនគិរី នៅថ្ងៃទី ១២ កញ្ញា បានបង្ហាញកាយវិកាដ៏គួរគោរពពីមហាជនតាមរយៈចុះពីរថយន្តទំនើបឡិចស៊ីស LX 570 ឱបបុរសចំណាស់ម្នាក់ជាសន្តិសុខសាលាឯកជនមួយ ដែលជាអតីតគ្រូមុខវិជ្ជាភូមិវិទ្យារបស់លោក ហើយបែកគ្នាតាំងពីបាក់ឌុបឆ្នាំ ១៩៨៦។
យោងតាមបណ្តាញសង្គមហ្វេសប៊ុកផ្លូវការរបស់លោក ញ៉ែម សំអឿន កាលពីម្សិលមិញ បានគូសបញ្ជាក់ថា "មកយកកូនចេញពីសាលា បានជួបអតីតលោកគ្រូ ម៉ម ប៊ុណ្ណា បែកពីគាត់ក្រោយបាក់ឌុបឆ្នាំ១៩៨៦។ គាត់ឥឡូវជាសន្តិសុខប្រចាំសាលាមត្តេយ្យផារ៉ាហ្គន ។សូមអរគុណលោកគ្រូដែលបានចងចាំខ្ញុំ"។
ជាសារអមដោយរូបថត៥សន្លឹក នៅលើគណនីហ្វេសប៊ុករបស់ខ្លួន ដោយទទួលបានការសាទរជាច្រើនពីអ្នកប្រើប្រាស់បណ្តាញសង្គម និងបានបញ្ចេញមតិវិជ្ជមានអមជាមួយរូបបេះដូង។
ឆ្លើយតបនឹងមតិសាទរជាច្រើន លោក ញ៉ែម សំអឿន បានអរគុណនូវរាល់ការខំមិនទាំងអស់ និង បានបញ្ជាក់ថាតម្លៃនៃសង្គមដែលមនុស្សយើងចង់បានគឺការដឹងគុណ ការជួយគ្នា និង មិនរើសអើង។សម្រាប់អភិបាលខេត្តរតគិរីរូបនេះបន្តថា ការគោរពមនុស្សដែលបានធ្វើគុណមកយើងតាមរយៈអ្វីក៏ដោយចុះ គឺជាតម្លៃនៃគុណធម៌ ។
បើតាមលោក ញ៉ែម សំអឿន លោក ម៉ម ប៊ុណ្ណា មុខវិជ្ជាភូមិវិទ្យា គឺជាគ្រូដ៏ល្អរបស់លោក លោកមានស្នាមញញឹមជានិច្ចចំពោះសិស្ស គឺជាឆ្នាំដែលលោកត្រូវប្រលងបាក់ឌុបឆ្នាំ១៩៨៦។ លោកគ្រូម៉ម ប៊ុណ្ណា បានចូលនិវត្តន៍ហើយ តែលោកគ្រូមិនចង់នៅស្ងៀមក៏បានចូលមកធ្វើការងារជាសន្តិសុខសាលារៀន៕
