មណ្ឌលគិរី៖ ពលរដ្ឋជាជនជាតិដើមភាគតិចនៅខេត្តមណ្ឌលគិរី សហការជាមួយអាជ្ញាធរខេត្ត ប្រារព្ធទិវាអន្តរជាតិជនជាតិដើមភាគតិចពិភពលោកលើកទី២៩ និងលើកទី១៩ នៅកម្ពុជា ក្រោមប្រធានបទ «យុវជន ជនជាតិដើមភាគតិច គឺជាតួអង្គនៃការផ្លាស់ប្ដូរ ដើម្បីសិទ្ទិស្វ័យសម្រេច» ដែលប្រព្រឹត្តទៅនាថ្ងៃទី៩ សីហា នៅមជ្ឈមណ្ឌលវប្បធម៌ជនជាតិដើមភាគតិច ក្នុងភូមិដោះក្រមុំ សង្កាត់ សុខដុម ក្រុងសែនមនោរម្យ ខេត្តមណ្ឌលគិរី។
យោងតាមសេចក្តីសម្រេចរបស់មហាសន្និបាតអង្គការសហប្រជាជាតិបានកំណត់យកថ្ងៃទី ០៩ ខែសីហា ជាទិវាអន្តរជាតិជនជាតិដើមភាគតិចពិភពលោក។ ជនជាតិដើមភាគតិចនៅលើពីភពលោកមានចំនួនប្រមាណ ៣៧០លាននាក់ ដែលកំពុងរស់នៅជាង៩០ប្រទេស។ ក្នុងនោះ ប្រទេសកម្ពុជាជាប្រទេសចំណាស់មួយដែលមានជនជាតិដើមភាគតិចអំបូរផ្សេងៗគ្នាចំនួន ២៤ក្រុម ដែលមានប្រជាជនសរុបប្រមាណជាង ១,៤ភាគរយ នៃចំនួនប្រជាជនកម្ពុជា។
ការរៀបចំអោយមានជាទិវាជនជាតិដើមភាគតិចនេះ គឺដើម្បីចូលរួមអភិរក្សវប្បធម៌ ប្រពៃណី ទំនៀមទំលាប់ និងភាសារបស់បងប្អូនជនជាតិដើមភាគតិចដែលទទួលបានការធានាដោយច្បាប់ជាតិ និងគោលនយោបាយជាតិ និងលើកកម្ពស់សិទ្ធិ សេដ្ឋកិច្ច សង្គម និងវប្បធម៌ ហើយលុបបំបាត់ទាំងស្រុងចំពោះការរើសអើងក្នុងសង្គម និងចូលរួមចំណែកកាត់ន្ថយភាពក្រីក្រ ក៏ដូចជាលើកកម្ពស់អភិបាលកិច្ចល្អស្របទៅនឹងគោលនយោបាយអភិវឌ្ឍន៍ជនបទ ២០១៩-២០៣០៕
