អាហ្រ្វិក៖ របបយោធារបស់ប្រទេសនីហ្សេ មិនអើពើនឹងឱសានវាទដោយប្រទេសអាហ្រ្វិក និងសមាជិករបស់សហគមន៍សេដ្ឋកិច្ចអាហ្វ្រិកខាងលិច CEDEAO ដែលព្រមានថា នឹងធ្វើអន្តរាគមន៍យោធា បើសិនរបបសឹកមិនព្រមប្រគល់អំណាចទៅឲ្យប្រធានាធិបតីនីហ្សេ។ នីហ្សេហាក់មិនខ្វល់ខ្វាយពីការគំរាមគំហែងរបស់ប្រទេសលោកខាងលិច និងអាហ្រ្វិកឡើយហើយ នីហ្សេថែមទាំងប្រកាសបិទដែនអាកាសរបស់ខ្លួនថែមទៀត។
រដ្ឋាភិបាលដែលធ្វើរដ្ឋប្រហាររបស់ប្រទេសនីហ្សេគឺលោកAbdourahamane Tiani បានសន្យាថានឹងមាន "ការឆ្លើយតបយ៉ាងខ្លាំងក្លា និងភ្លាមៗ" ចំពោះការរំលោភបំពានណាមួយនៃដែនអាកាសរបស់ប្រទេសនីហ្សេ ចំពេលដែលប្រទេសអាហ្វ្រិក និងនីហ្សេរីយ៉ាបានប្រកាសត្រៀមខ្លួនសម្រាប់អន្តរាគមន៍យោធាដ៏ខ្លាំងខ្លាបន្ទាប់ពីថ្ងៃកំណត់ ដែលកំណត់ដោយសហគមន៍សេដ្ឋកិច្ចនៃរដ្ឋអាហ្វ្រិកខាងលិច (ECOWAS)។
រដ្ឋាភិបាលយោធាធ្វើរដ្ឋប្រហារបានប្រកាសកាលពីយប់ថ្ងៃអាទិត្យថា "ប្រឈមមុខនឹងការគំរាមកំហែងនៃការអន្តរាគមន៍ដែលកាន់តែច្បាស់ពីប្រទេសជិតខាង ដែនអាកាសរបស់នីហ្សេត្រូវបានបិទចាប់ពីថ្ងៃនេះនៅថ្ងៃអាទិត្យរហូតដល់មានការជូនដំណឹងបន្ថែម" ។សេចក្តីថ្លែងការណ៍បានព្រមានថា "ការប៉ុនប៉ងណាមួយដើម្បីបំពានដែនអាកាស" នឹងនាំឱ្យមាន "ការឆ្លើយតបយ៉ាងខ្លាំងក្លា និងភ្លាមៗ" ពីក្រុមទាហានរដ្ឋប្រហារ។
សហគមន៍សេដ្ឋកិច្ចនៃរដ្ឋអាហ្វ្រិកខាងលិច (ECOWAS) បានដាក់ទណ្ឌកម្មយ៉ាងតឹងរ៉ឹង ហើយបានចេញឱសានវាទរយៈពេលមួយសប្តាហ៍ដល់មេដឹកនាំយោធាកាលពីសប្តាហ៍មុន ដោយគំរាមកំហែងថានឹងបញ្ជូនកងទ័ពចូលទៅក្នុងប្រទេសនីហ្សេ លុះត្រាតែឧត្តមសេនីយ Abdourahamane Tchiani និងគណៈរដ្ឋមន្ត្រីរបស់លោកចុះចេញពីតំណែង។
យ៉ាងណាក៏ដោយ កាលបរិច្ឆេទកំណត់បានកន្លងផុតទៅដោយគ្មាការចចារថ្មីពីរដ្ឋាភិបាលដែលបានធ្វើរដ្ឋប្រហារ ទោះបីជាយោធានៃសមាជិក ECOWAS ជាច្រើននាក់បានយល់ព្រមលើផែនការសម្រាប់អន្តរាគមន៍យោធាដ៏ខ្លាំងខ្លានៅក្នុងកិច្ចប្រជុំមួយកាលពីថ្ងៃសុក្រក៏ដោយក្រុមយោធានៃប្រទេសអាហ្វ្រិកត្រូវការ"ពេលវេលាបន្ថែមទៀត" ដើម្បីរៀបចំសម្រាប់ការលុកលុយ។
មេដឹកនាំរដ្ឋប្រហារទទួលបានការគាំទ្រពីសាធារណជនយ៉ាងច្រើន ហើយត្រូវបានគាំទ្រដោយរដ្ឋាភិបាលនៃប្រទេសម៉ាលី និងបួគីណាហ្វាសូ ដែលប្រទេសទាំងពីរបានដណ្តើមអំណាចនៅក្នុងរលកនៃភាពចលាចលប្រឆាំងបារាំងនាពេលថ្មីៗនេះ។ ប្រទេសទាំងពីរបានសន្យាថានឹងចាត់ទុកការឈ្លានពានរបស់អាហ្វ្រិក ECOWAS ណាមួយជាការប្រកាសសង្រ្គាមប្រឆាំងនឹងពួកគេ។ របបយោធាអាហ្វ្រិកក៏បានចោទថាមេដឹករដ្ឋប្រហារប្រទេសនីហ្សេបានស្នើសុំជំនួយដល់ក្រុមហ៊ុនយោធាឯកជន Wagner របស់រុស្ស៊ី ប៉ុន្តែទាំងវិមានក្រឹមឡាំង និងក្រុម Wagner Group មិនបានធ្វើអត្ថាធិប្បាយលើការអះអាងនេះទេ។
ក្នុងពេលនេះនាយករដ្ឋមន្រ្តីដែលត្រូវបានគេធ្វើរដ្ឋប្រហារគឺលោក Bazoum បានអំពាវនាវឱ្យមានអន្តរាគមន៍ពីលោកខាងលិច ដោយអះអាងថា លុះត្រាតែសហរដ្ឋអាម៉េរិក និង ECOWAS ជួយគាត់ឱ្យទទួលបានអំណាចឡើងវិញនោះបើមិនដូចច្នេះទេក្រុមទាហានស៊ីឈ្នួល Wagner នឹងមាន "លុកលុយបើចំហរ" ចូលទៅក្នុងតំបន់ ហើយតំបន់កណ្តាល Sahel ទាំងអស់ "អាចធ្លាក់ក្រោមឥទ្ធិពលរុស្ស៊ី" ។
សហរដ្ឋអាម៉េរិក និងសហភាពអឺរ៉ុប បានដាក់ទណ្ឌកម្មលើប្រទេសនីហ្សេ បន្ទាប់ពីរដ្ឋប្រហារ ហើយបារាំងបានប្រកាសថា ខ្លួនគាំទ្រកិច្ចខិតខំប្រឹងប្រែងរបស់សហគមន៍សេដ្ឋកិច្ចនៃរដ្ឋអាហ្វ្រិកខាងលិច ECOWAS ដើម្បីនាំយកលោក Bazoum ដែលជាសម្ព័ន្ធមិត្តរបស់ទីក្រុងប៉ារីស ឱ្យឡើងកាន់អំណាចវិញ។ ទោះជាយ៉ាងណា រដ្ឋាភិបាលបារាំងមិនបានបញ្ជាក់ច្បាស់ថាតើខ្លួនគាំទ្រអន្តរាគមន៍យោធាដោយផ្ទាល់ឬអត់នោះទេ៕
