ព្រះចៅអធិការវត្តស្វាយដង្គំ លាចាកសិក្ខាបទ ក្រោយសាងព្រះផ្នួស៣៣វស្សា

បាត់ដំបង៖ សម្ដេចព្រះមហាអរិយវង្ស បណ្ឌិត ឃី សុវណ្ណរតនា ព្រះចៅអធិការវត្តមង្គលវ័ន (វត្តស្វាយដង្គំ) លាលែងពីព្រះគោរម្យងារ «សម្ដេចព្រះសង្ឃមហាអរិយវង្ស» និងលាចាកសិក្ខាបទ នាថ្ងៃទី២ សីហា នេះ។ លាចាកសិក្ខាបទនេះ បន្ទាប់ពីព្រះចៅអធិការវត្ត បានសាងព្រះផ្នួសបួសជាបព្វជិតអស់រយៈពេល៣៣វស្សា។

ដោយព្រោះមានភាពនឿយណាយអស់និស្ស័យក្នុងព្រះផ្នួស ហើយមានបំណងចូលរួមចំណែកបម្រើសង្គមជាតិក្នុងភាពជាឃរាវាសត ព្រះចៅអធិការវត្តស្វាយដង្គំ បានលាចាកសិក្ខាបទ បន្ទាប់ពីបានបួសជាបព្វជិតអស់រយៈពេល៣៣វស្សា។

ព្រះចៅអធិការវត្ត បានរួមចំណែកកសាងនិង អភិវឌ្ឍវិស័យព្រះពុទ្ធសាសនាតាមរយៈស្ថាប័នសម្តេចព្រះសង្ឃរាជ គណៈសង្ឃនាយក នៃព្រះរាជាណាចក្រកម្ពុជា និងវិស័យពុទ្ធិកសិក្សា ព្រមទាំងចូលរួមជួយកិច្ចការសង្គម តាំងពីឆ្នាំ២០០២ រហូតដល់បច្ចុប្បន្ន ដែលរយៈពេល ២១ឆ្នាំ បន្ទាប់ពីបានបញ្ចប់ការ សិក្សាថ្នាក់បរិញ្ញាបត្រ អនុបណ្ឌិត និងបណ្ឌិត នៅប្រទេសស្រីលង្កា និងប្រទេសឥណ្ឌា៕