ភ្នំពេញ៖ នៅក្នុងឆមាសទី១ឆ្នាំ២០២៣ ការនាំចូលសម្ភារៈនិងបរិក្ខាសំណង់កើនឡើងចំនួន០,៤% ដល់ប្រមាណ៩១១លានដុល្លារអាម៉េរិកធៀបនឹងរយៈពេលក្នុងឆ្នាំ២០២២។ ចំពោះតម្លៃលំនៅឋាននៅកម្ពុជា បានកើនឡើង៦,៤% ក្នុងនោះតម្លៃលំនៅឋាននៅភ្នំពេញបានកើនឡើង៦,៩% និងតម្លៃលំនៅឋាននៅតាមបណ្ដាខេត្តផ្សេងបានកើនឡើង៥,៣%។ នេះបើតាមការប៉ាន់ស្មានរបស់មន្រ្តីធនាគារជាតិកម្ពុជា។
ជាមួយគ្នានេះ លោក ឡៅ ទិព្ធសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានលើកឡើងថា វិស័យសំណង់ជាវិស័យមួយមានការអភិវឌ្ឍន៍ និងរីកចម្រើនគួរឱ្យកត់សម្គាល់ដោយឆ្លុះបញ្ចាំងតាមរយៈការកើនឡើងចំនួនអ្នកអភិវឌ្ឍន៍អចលនវត្ថុ និងគម្រោងសាងសង់។ ប្រសាសន៍នេះត្រូវបានលើកឡើងនៅក្នុងកិច្ចពិភាក្សាតុមូលស្ដីពីស្ថានភាពទីផ្សារអចលនទ្រព្យនៅកម្ពុជា នាថ្ងៃទី២៣ ខែមិថុនា ឆ្នាំ២០២៣។
លោក ឡៅ ទិព្ធសីហា បានគូសបង្ហាញថា គម្រោងបុរីលំនៅឋាននិងបណ្តុំលំនៅឋានមានលក្ខណៈជាបុរី មានចំនួន ៥៤៧ គម្រោង, សំណង់លំនៅឋានប្រភេទល្វែងមានចំនួន ៤០ ៩១៧ខ្នង។ ចំណែកគម្រោងអគារខ្ពស់ៗ ចាប់ពី៥ជាន់ឡើងនៅទូទាំងប្រទេសកម្ពុជាមានចំនួន ២ ៥៨៦ អគារ ក្នុងនោះនៅរាជធានីភ្នំពេញចំនួន ១ ៧១១អគារ ខេត្តព្រះសីហនុចំនួន ៦៩០អគារ នៅខេត្តបន្ទាយមានជ័យចំនួន ១៤២អគារ និងខេត្តផ្សេងៗចំនួន ៤៣ អគារ។ ក្នុងនោះ អគារចាប់ពី ៥ជាន់ទៅ ៩ជាន់ មានចំនួន ១៤៦៣ អគារ, អគារចាប់ពី ១០ជាន់ទៅ ១៩ជាន់ មានចំនួន ៧០៥ អគារ, អគារចាប់ពី ២០ជាន់ទៅ ២៩ជាន់ មានចំនួន ២៣៤ អគារ, អគារចាប់ពី ៣០ជាន់ទៅ ៣៩ជាន់ មានចំនួន ១៣២ អគារ, និង អគារចាប់ពី ៤០ជាន់ឡើង មានចំនួន ៥២ អគារ។
បើតាមក្រសួងរៀបចំដែនដី នគរូបនីយកម្ម និងសំណង់ នារយៈពេល៥ខែ ឆ្នាំ២០២៣នេះ ក្រសួងបានផ្ដល់លិខិតអនុញ្ញាតឲ្យសាងសង់ចំនួន ១,៤៦៣គម្រោង ក្នុងទុនវិនិយោគ ជាង២,២៧០លានដុល្លារ កើនឡើង១៣៨ភាគរយ បើធៀបរយៈពេលដូចគ្នាកាលពីឆ្នាំ២០២២។ នេះជាការបញ្ជាក់របស់លោក ឡៅ ទិព្ធសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នៅក្នុងកិច្ចពិភាក្សាតុមូលស្ដីពីស្ថានភាពទីផ្សារអចលនទ្រព្យនៅកម្ពុជា នាថ្ងៃទី២៣ ខែមិថុនា ឆ្នាំ២០២៣។
តាមទិន្នន័យជំរឿនប្រជារាស្ត្រឆ្នាំ២០០៨នឹងមានប្រជាជនប្រមាណជាង ១៨លាននាក់នៅឆ្នាំ ២០៣០ នឹងមានតម្រូវការលំនៅឋានថ្មីប្រមាណជាង ១,១លានបន្ថែមទៀត។ ក្នុងនោះ សម្រាប់រាជធានីភ្នំពេញ ទីក្រុង និងទីប្រជុំជន មានតម្រូវការប្រមាណ ៨០ម៉ឺនលំនៅឋាន បើគិតជាមធ្យមមានតម្រូវការលំនៅឋានប្រមាណជាង ៥ម៉ឺនលំនៅឋានក្នុង១ ឆ្នាំ។ នេះជាការបញ្ជាក់របស់លោក ឡៅ ទិព្ធសីហា៕
