.png?1741682398)
ភ្នំពេញ៖ កម្ពុជាបាននាំចេញផ្លែស្វាយស្រស់ទៅកាន់ទីផ្សារក្រៅប្រទេសចំនួន ៩១ ៦៨៧,៣៧តោនក្នុងឆមាសទី១ ឆ្នាំ២០២៣ ធ្លាក់ចុះ ២០,៩៣% បើធៀបនឹងរយៈពេលដូចគ្នាក្នុងឆ្នាំ២០២២។ ការធ្លាក់ចុះនេះ ដោយសារតែកត្តាមួយចំនួនដូចជា អាកាសធាតុ ការប្រែប្រួលនៃអតិផរណាជាដើម។ នេះជាការលើកឡើងរបស់ឧកញ៉ា ហ៊ុន ឡាក់ អ្នកវិនិយោគ កសិ-ផលិតកម្ម និងនាំចេញដំណាំឈើហូបផ្លែ និងបន្លែសុវត្ថិភាព មកកាន់ស៊ីស៊ីថាមស៍។
ឧកញ៉ា ហ៊ុន ឡាក់ បានលើកឡើងថា សម្រាប់ឆមាសទី១ឆ្នាំ២០២៣នេះ កម្ពុជាបាននាំចេញផ្លែស្វាយស្រស់ទៅកាន់ទីផ្សារក្រៅប្រទេសជាង៩ម៉ឺនតោន ធ្លាក់ចុះជាង២០% ហើយជាតម្លៃប៉ាន់ស្មានផ្លែស្វាយស្រស់ក្នុងមួយតោនមានតម្លៃ១,៤០០ដុល្លារ ហើយភាគច្រើននាំចេញទៅប្រទេសចិន និងថៃ។
អ្នកវិនិយោគកសិ-ផលិតកម្មរូបនេះបានបន្តថា មូលហេតុនៃការធ្លាក់ចុះការនាំចេញនេះគឺដោយសារតែកត្តាប្រឈមមួយចំនួនដូចជា អាកាសធាតុ វិបត្តិសេដ្ឋកិច្ចសកលលោកបណ្តាលឱ្យការបញ្ជាទិញទំនិញគ្រប់ប្រភេទមានការថយចុះ និងបង្អាក់ចរន្តពាណិជ្ជកម្ម និងការប្រែប្រួលអតិផរណាជាដើម។ ទោះជាយ៉ាងណា អ្នកវិនិយោគកសិ-ផលិតកម្មរូបនេះ ជឿជាក់ថា ការនាំចេញផ្លែស្វាយស្រស់កម្ពុជានឹងមានសភាពធម្មតាវិញនៅឆមាសទី២ឆ្នាំ២០២៣នេះ ហើយនៅត្រីមាសទី៣ឆ្នាំនេះតម្លៃផ្លែស្វាយស្រស់ក៏នឹងកើនឡើងមកវិញដែរ។
គួរបញ្ជាក់ថា សម្រាប់រយៈពេល ១១ ខែ ឆ្នាំ២០២២ ការនាំចេញផ្លែស្វាយស្រស់របស់កម្ពុជាមានចំនួន ១៥២ ៩៩៥ តោន។ ប្រទេសដែលទទួលទិញផ្លែស្វាយស្រស់ពីកម្ពុជារួមមាន វៀតណាម ថៃ ចិន កូរ៉េ ហុងកុង អូទ្រីស ថៃ។ នេះបើយោងតាមក្រសួងកសិកម្ម រុក្ខាប្រមាញ់ និងនេសាទ៕
