ភ្នំពេញ៖ អត្តពលិកជម្រើសជាតិកម្ពុជា នាថ្ងៃទី២៧ មិនថុនានេះ ដែលបានឈ្នះមេដាយគ្រប់កម្រិត នៅក្នុងព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ សរុបចំនួន២៨២ គ្រឿង បានទទួលប្រាក់រង្វាន់លើកទឹកចិត្តពីរាជរដ្ឋាភិបាលកម្ពុជា នៅទីស្ដីការក្រសួងការពារជាតិ។
ក្រោមអធិតីភាពសម្ដេច ទៀ បាញ់ គណៈកម្មាធិការជាតិរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម បានរៀបចំកិច្ចប្រជុំបូកសរុបលទ្ធផលការងារ និងប្រគល់ប្រាក់រង្វាន់លើកទឹកចិត្ត ដល់គ្រូបង្វឹក គ្រូជំនួយ និងកីឡាករ-កីឡាការិនីដែលដណ្ដើមបានមេដាយមាស ប្រាក់ និងសំរឹទ្ធ ដែលមេដាយសរុបចំនួន ២៨២ គ្រឿង ក្នុងនោះមានមេដាយមាសចំនួន ៨១ គ្រឿង ប្រាក់ចំនួន ៧៤ គ្រឿង និងសំរឹទ្ធចំនួន ១២៧ គ្រឿង សម្រាប់ព្រឹត្តិការណ៍ស៊ីហ្គេម លើកទី៣២។ ព្រឹត្តិការណ៍អាស៊ានប៉ារ៉ាហ្គេមវិញ កម្ពុជាដណ្ដើមបានមេដាយសរុបចំនួន ៧១ គ្រឿង ក្នុងនោះមេដាយមាសចំនួន ៩គ្រឿង ប្រាក់ចំនួន ១៨គ្រឿង និងសំរឹទ្ធចំនួន ៤៤ គ្រឿង។
គួរបញ្ជាក់ថា កីឡាករ-កីឡាការិនីដែលទទួលបានមេដាយមាស ១គ្រឿង ទទួលបានប្រាក់រង្វាន់ចំនួន ៤០លានរៀល សម្រាប់មេដាយប្រាក់ ១គ្រឿង ទទួលបានចំនួន ៣០លានរៀល និងជ័យលាភីមេដាយសំរឹទ្ធ ១គ្រឿងទទួលបានចំនួន ១៥លានរៀលផងដែរ៕
