ក្រុមបាល់ទះវិសាខារបស់កម្ពុជានឹង ប៉ះក្រុមម៉ាឡេស៊ី និងកោះតៃវ៉ាន់ នៅស្អែកនេះ

ភ្នំពេញ៖ ក្រុមកីឡាបាល់ទះវិសាខា បានត្រៀមខ្លួនក្នុងការប្រកួតដែលប៉ះជាមួយម្ចាស់ផ្ទះម៉ាឡេស៊ី និងក្រុមមកពីកោះតៃវ៉ាន់ ដើម្បីចូលរួមការប្រកួតពានរង្វាន់បាល់ទះបុរសក្នុងសាល Johor Bahru-Mayor’s Cup 2023 នៅប្រទេសម៉ាឡេស៊ី។

ក្រុមកីឡាបាល់ទះវិសាខា នឹងត្រូវប៉ះក្រុមម្ចាស់ផ្ទះម៉ាឡេសុី Wei Xu Johor SUKMA និងក្រុមបាល់ទះមកពីកោះតៃវ៉ាន់ Win Streak Taiwan ដែលជាការប្រកួតសន្សំពិន្ទុដំបូងក្នុងពូល A ក្នុងព្រឹត្តិការណ៍ Johor Bahru-Mayor’s Cup 2023 ដែលចាប់ផ្ដើមថ្ងៃទី២២ ខែមិថុនា។ ក្រុមកីឡាបាល់ទះក្នុងសាលនេះ គឺមានប្រទេសចូលរួមចំនួន ៥ រួមមាន៖ កម្ពុជា កោះតៃវ៉ាន់ សិង្ហបុរី ថៃ និងម្ចាស់ផ្ទះម៉ាឡេសុី។

គួរបញ្ជាក់ថា ក្រុមបាល់ទះវិសាខា ស្ថិតក្នុងពូល A រួមមានក្រុម Wei Xu Johor SUKMA, Sarawak និងក្រុម Win Streak Taiwan។ ចំណែកពូល B មានក្រុមបាល់ទះ Shah Alam City Council, Way Li Taiwan និងSongkhla Thailand។ ហើយនេះ ក៏ជាលើកដំបូរដែលក្រុមបាល់ទះវិសាខាកម្ពុជា បានចូលរួមប្រកួតពានរង្វាន់លីគនៃព្រឹត្តិការណ៍ Johor Bahru-Mayor’s Cup 2023ផងដែរ៕