![](https://cdn.cc-times.com/kh.cc-times.com/media/3368/large/%E1%9E%A2%E1%9E%B6%E1%9E%80%E1%9E%B6%E1%9E%9F%E1%9E%85%E1%9E%9A%E1%9E%8E%E1%9F%8D%E1%9E%80%E1%9E%98%E1%9F%92%E1%9E%96%E1%9E%BB%E1%9E%87%E1%9E%B6_%E1%9E%9F%E1%9F%8A%E1%9E%B7%E1%9E%93_%E1%9E%9F%E1%9F%81%E1%9E%9A%E1%9E%B8%E1%9E%9C%E1%9E%BB%E1%9E%8F%E1%9F%92%E1%9E%90%E1%9E%B6.jpg?1595393819)
ភ្នំពេញ៖ ជើងហោះហើរកម្ពុជាបានកើនឡើង២០% ក្នុងរយៈពេលចាប់ពីខែឧសភា ដល់ខែកក្កដា ឆ្នាំ២០២០។ នេះបើតាមប្រសាសន៍របស់លោក ស៊ិន ចាន់សេរីវុត្ថា អ្នកនាំពាក្យអាកាសចរណ៍ស៊ីវិលកម្ពុជា បានថ្លែងប្រាប់ស៊ីស៊ីថាមស៍នៅថ្ងៃទី២២ ខែកក្កដា ឆ្នាំ២០២០។
លោក ស៊ិន ចាន់សេរីវុត្ថា អ្នកនាំពាក្យអាកាសចរណ៍ស៊ីវិលកម្ពុជា មានប្រសាសន៍ថា បើគិតចាប់ពីខែឧសភាដល់ខែកក្កដានេះ កម្ពុជាបានកើនឡើងនូវជើងហោះហើរចំនួន២០% ដែលភាគច្រើនសុទ្ធតែជាប្រជាជនខ្មែរដែលធ្វើដំណើរមកពីប្រទេសកូរ៉េ ចិន និងម៉ាឡេស៊ីជាដើម។ ក្រៅពីនេះក៏មានជនជាតិចិនមួយចំនួនដែរ ដែលត្រូវមកកម្ពុជាដើម្បីធ្វើធ្វើជំនួញ។ ចំណែកឯការហោះហើរជាលក្ខណៈទេសចរណ៍គឺពុំទាន់មានវត្តមាននៅកម្ពុជានៅឡើយទេ។
លោក ស៊ិន ចាន់សេរីវុត្ថា បន្តថា ចំពោះអ្នកវិនិយោគចិនខ្នាតធំនៅកម្ពុជា និងអ្នកជំនាញការផ្សេងៗនឹងត្រូវបានបន្ថូរបន្ថយក្នុងការធ្វើដំណើរមកវិនិយោគនៅកម្ពុជា។ ករណីបន្ថូរបន្ថយនេះគឺសម្រាប់តែបុគ្គល ឬក្រុមបុគ្គលណាមួយដែលជាប់ពាក់ព័ន្ធនឹងការធ្វើជំនួញខ្នាតធំនៅកម្ពុជាតែប៉ណ្ណោះ។ ចំណែកការធ្វើដំណើរក្នុងគោលដៅទេសចរណ៍គឺពុំទាន់មានការបន្ថូរបន្ថយនៅឡើយទេ៕