ភ្នំពេញ៖ បុរសជនបរទេសម្នាក់ដែលមានគណនីហ្វេសប៊ុកឈ្មោះថា Jeremie Montessuis បានបង្ហោះរូបភាពជាច្រើនសន្លឹក បង្កើតចេញពីការស្រមើស្រមៃរបស់បច្ចេកវិទ្យា AI ដោយការប្រើប្រាស់កម្មវិធី Mid Journey។ រូបភាពAI ទាំងនោះត្រូវបានបង្កើតជាផ្ទាំងទស្សនីយភាព ពីអតីតកាលនៅកម្ពុជា ក្នុងទសវត្សទី៦០ ដែលកំពុងផ្ទុះការគាំទ្រពីសំណាក់មហាជនក្នុងបណ្តាលសង្គម។
យោងតាមខ្លឹមសាររបស់ គណនីហ្វេសប៊ុក Jeremie Montessuis បានសរសេររៀបរាប់ថា« Cambodia Swinging 1960s ខ្ញុំបានព្យាយាមអស់ពីសមត្ថភាព ដើម្បីបង្កើតបរិយាកាស តាមរយៈការប្រើប្រាស់កម្មវិធី Mid Journey និងមានរូបថតមួយក្រុមទៀតនឹងមកក្នុងប៉ុន្មានសប្ដាហ៍ទៀត។»
លោក Jeremie បានបន្តថា «ខ្ញុំមិនមានកម្មសិទ្ធិបញ្ញាលើរូបទាំងអស់នេះទេ ការងារនេះគឺដូចជារឿងកំប្លែងបែបស្រមើស្រមៃ ដើម្បីភាពសប្បាយរីករាយ នាំមកនូវផ្ទាំងទស្សនីយភាពនៅក្នុងពេលវេលាពីអតីតកាលដែលយើងកំពុងជួបប្រទះនាពេលបច្ចុប្បន្ននេះ ដូចជា ជំងឺរាលត្បាតកូវីដ-១៩,ការឡើងកំដៅផែនដី, សង្គ្រាមនៅក្នុងប្រទេសអ៊ុយក្រែន ។ល។ អ្នកទាំងអស់គ្នាអាចប្រើប្រាស់រូបភាពទាំងនេះ ដោយសេរី និងធ្វើការចែករំលែក សូមរីករាយជាមួយរូបភាពពីអតីតកាល ក្នុងទសវត្ស ៦០។ AI បានបង្កើតរូបថតបែបស្រមើស្រមៃ ប៉ុន្តែរូបភាពពិត ត្រូវបានបង្កើតដោយយកចិត្តទុកដាក់។ អរគុណសម្រាប់ការចូលចិត្ត និងគាំទ្រ។»
