ភ្នំពេញ៖ គិតត្រឹមខែឧសភា ឆ្នាំ២០២៣នេះ គម្រោងសាងសង់«អាកាសយានដ្ឋាន អន្តរជាតិតេជោ ក្រុងតាខ្មៅ» សម្រេចការសាងសង់បានជាង៥០ភាគរយ ហើយបច្ចុប្បន្នកំពុងពង្រឹងការសាងសង់បន្ថែមដោយធ្វើយ៉ាងណាឱ្យដំណើរការបាននៅដើមឆ្នាំ២០២៥។ នេះជាការលើកឡើងរបស់ឧកញ៉ា ឆាល វ៉ាន់ នាយកក្រុមហ៊ុន Cambodia Airport Investment Co., Ltd. (CAIC) ក្នុងពិធីចុះហត្ថលេខាលើកិច្ចព្រមព្រៀងបណ្តាក់ទុនរួមគ្នា លើការថែទាំ ជួសជុល និងកែលម្អ (MRO-Maintenance, Repair and Overhaul) នៅអាកាសយានដ្ឋានអន្តរជាតិតេជោ ជាមួយក្រុមហ៊ុនវិស្វកម្ម SIA ដែលមានមូលដ្ឋាននៅប្រទេសសិង្ហបុរី នាថ្ងៃទី ៣០ ខែឧសភា។
ឧកញ៉ា ឆាល វ៉ាន់ បានគូសបញ្ជាក់ថា ស្របពេលដែលអាកាសយានដ្ឋានអន្តរជាតិតេជោ បើកដំណើរលារជាផ្លូវការនៅដើមឆ្នាំ២០២៥ នៅក្នុងអាកាសយានដ្ឋាននេះក៏នឹងផ្តើមបម្រើសេវាកម្មជួសជុល និង ថែទាំយន្តហោះក្នុងតំបន់ ហើយប្រជាជនកម្ពុជា ជាពិសេសយុវជនក៏អាចចេញពីជំនាញជួសជុលយន្តហោះដែលពីមុនមកមិនធ្លាប់មាន។
«អាកាសយានដ្ឋាន អន្តរជាតិតេជោ ក្រុងតាខ្មៅ» ត្រូវបានរាជរដ្ឋាភិបាលអនុញ្ញាតឲ្យក្រុមហ៊ុន CAIC ដែលជាក្រុមហ៊ុនបណ្តាក់ទុនរួមគ្នារវាងរាជរដ្ឋាភិបាលកម្ពុជា តាមរយៈរដ្ឋលេខាធិការដ្ឋានអាកាសចរស៊ីវិល និងសាជីវកម្មវិនិយោគក្រៅប្រទេសកម្ពុជា (Overseas Cambodia Investment Corporation-OCIC) ដើម្បីសាងសង់ និងអភិវឌ្ឍអាកាសយានដ្ឋានអន្តរជាតិភ្នំពេញថ្មី នៅខេត្តកណ្តាល និងតាកែវ ដែលមានចម្ងាយប្រហែល ២០ គីឡូម៉ែត្រពីភាគខាងត្បូងរាជធានីភ្នំពេញ។
អាកាសយានដ្ឋានអន្តរជាតិតេជោ (TIA) (ដំណាក់កាលទី១) គឺជាព្រលានយន្តហោះ Greenfield ដែលមានថវិកាវិនិយោគសរុបចំនួន ១,៥ ពាន់លានដុល្លារ។ អាកាសយានដ្ឋានអន្តរជាតិតេជោ ដែលនឹងត្រូវអភិវឌ្ឍជាបីដំណាក់កាល ត្រូវបានរចនាឡើងសម្រាប់អ្នកដំណើរ ៥០ លាននាក់ ជាមួយនឹងផ្លូវរត់ចំនួន៣ និងស្ថានីយផ្កាយរណបមួយនៅទូទាំងផ្ទៃដីសរុប២,៦០០ហិកតា៕
