ភ្នំពេញ៖ នៅត្រីមាសទី១ ក្នុងឆ្នាំ២០២៣នេះ កម្ពុជាសម្រេចកបានការនាំចេញទំនិញទៅកាន់ទីផ្សារអន្តរជាតិ ក្នុងទំហំទឹកប្រាក់ជាង ៥,៣៩២,០១២,៥៤៩.៨០ដុល្លារអាម៉េរិក បានធ្លាក់ចុះ៥.៦៨% បើធៀបនឹងរយៈពេលដូចគ្នានៅឆ្នាំ២០២២។ នេះបើតាមរបាយការណ៍របស់ក្រសួងពាណិជ្ជកម្មដែលផ្តល់មកកាន់ស៊ីស៊ីថាមស៍ដោយលោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម។
បើតាមរបាយការណ៍ ទំនិញដែលកម្ពុជាបាននាំចេញទៅកាន់ទីផ្សារអន្តរជាតិមានដូចជា៖សម្លៀកបំពាក់, កាបូប, ស្បែកជើង, គ្រឿងបន្លាស់រថយន្ត, គ្រឿងអេឡិចត្រូនិច, គ្រឿងបន្លាស់កង់, ឈើ, អង្ករ, ដំឡូងមី, ពោត, សណ្ដែក, កៅស៊ូ, ស្ករ, ថ្នាំជក់, ខ្សាច់ និងផលិតផលជលផល និងកសិផលថ្សេងៗទៀត។ ក្នុងចំណោមមុខទំនិញទាំងអស់នេះ ទំនិញដែលកម្ពុជាបាននាំចេញច្រើនជាងគេនៅត្រីមាសទី១ឆ្នាំ២០២៣នេះគឺសម្លៀកបំពាក់ដែលមានទំហំទឹកប្រាក់ចំនួន ១,៦៥៤,៦៣១,៣៧៧,១៧ ដុល្លារអាម៉េរិក បន្ទាប់មកទៀតគឺកាបូប និងស្បែកជើង។
របាយការណ៍បញ្ជាក់ថា នៅត្រីមាសទី១ឆ្នាំនេះ សហរដ្ឋអាម៉េរិក គឺជាទីផ្សារដ៏ធំជាងគេសម្រាប់ការនាំចេញរបស់កម្ពុជា ដែលសម្រេចបានទឹកប្រាក់ចំនួន ១,៨២៣,០៥៣,២៧៩.៧៥ដុល្លារអាម៉េរិក បន្ទាប់មកគឺប្រទេសវៀតណាម ស្ថិតក្នុងចំណាត់ថ្នាក់លេខ២ ដែលមានទឹកប្រាក់ជិត ១ពាន់លានដុល្លារ ខណៈចិនគឺជាទីផ្សារធំទី៣ ដែលកម្ពុជាបាននាំចេញក្នុងទឹកប្រាក់ចំនួន ៣២៨,៦៤៥,៧០៥.២៨ដុល្លារអាម៉េរិក។ នេះបើយោងតាមរបាយការណ៍របស់ក្រសួងពាណិជ្ជកម្ម៕
.jpg?1713859196)
