ឧកញ៉ា ទៀ វិចិត្រ ទទួលបានសិទ្ធិវិនិយោគលើ«កោះមួយ»នៅក្រុងកោះរ៉ុង

ព្រះសីហនុ៖ ឧកញ៉ា ទៀ វិចិត្រ ដែលជាអ្នករកស៊ីដ៏មានឥទ្ធិពលចាក់គ្រឹះយ៉ាងរឹងមាំក្នុងខេត្តព្រះសីហនុ ឬហៅថា ជាពាណិជ្ជករកំពុងរះនៅទិសនារតី បានទទួលសិទ្ធិវិនិយោគជាផ្លូវការពីក្រុមប្រឹក្សាភិវឌ្ឍន៍កម្ពុជា ធ្វើការអភិវឌ្ឍនៅលើកោះមួយ ដែលមានទីតាំងស្ថិតនៅសង្កាត់កោះរ៉ុងសន្លឹម ក្រុងកោះរ៉ុង។គម្រោងនេះ ត្រូវចំណាយលុយវិនិយោគប្រមាណ ៧.៧ លានដុល្លារអាម៉េរិក និងបង្កើតការងារជូនពលរដ្ឋជាច្រើននាក់។

យោងតាមក្រុមប្រឹក្សាភិវឌ្ឍន៍កម្ពុជា បានគូសបញ្ជាក់ថា រដ្ឋាភិបាលបានសម្រេចចេញវិញ្ញាបនបត្រចុះបញ្ជីគម្រោងវិនិយោគ «កោះមួយ» ដែលមានទីតាំងស្ថិតនៅសង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ មានចំណាយប្រមាណ ៥០ គីឡូម៉ែត្រពីក្រុងព្រះសីហនុ និងចម្ងាយប្រមាណ ៤៧ គីឡូម៉ែត្រពីកោះពួឡូវៃ ក្បែរព្រំដែនប្រទេសថៃ។

ប្រភពដដែល បានអះអាងថា គម្រោងគម្រោងវិនិយោគរបស់ឧកញ៉ា ទៀ វិចិត្រនេះ មានតម្លៃប្រមាណ ៧.៧ លានដុល្លារអាម៉េរិក និង បង្កើតឱកាសការងារចំនួន ៤៩ កន្លែង។គម្រោងនេះ ត្រូវបានគេរំពឹងថា នឹងចូលរួមចំណែកយ៉ាងសំខាន់សម្រាប់បង្កើតនូវតំបន់ទេសចរណ៍ក្នុង ខេត្តព្រះសីហនុ ដើម្បីទាក់ទាញភ្ញៀវទេសចរចូលមកខេត្តកាន់តែច្រើនបន្ថែមទៀតសម្រាប់ថ្ងៃអនាគត។

គួរបញ្ជាក់ថា ឧកញ៉ា ទៀ វិចិត្រ ជាអ្នករកស៊ីនៅទិសនារតីដ៏ល្បីល្បាញច្រើនឆ្នាំមកហើយលើវិស័យ ទេសចរណ៍ បដិណ្ឋារកិច្ច ភេសជ្ជៈ ប្រេងឥន្ទនៈ និងអចលនទ្រព្យ ស្ថិតនៅក្នុងខេត្តព្រះសីហនុ។ ​លោកជាកូនបង្កើតលោក ទៀ វិញ មេបញ្ជាការ​កងទ័ពជើងទឹក និង​បងប្រុស​ឈ្មោះ ទៀ សុខា មេបញ្ជាការរង​យោធា​ជើង​ទឹក ជាក្មួយសម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ។

ក្រៅពីការងារជំនួញលោកឧកញ៉ា ទៀ វិចិត្រ មានតួនាទីបន្ថែមទៀត ជាប្រធានសមាគមភ្នាក់ងារដឹកជញ្ជូនទេសចរណ៍ជលយាន ខេត្តព្រះសីហនុ,អនុប្រធានកិត្តិយស​ សាខាកាកបាទក្រហមកម្ពុជា ខេត្តព្រះសីហនុ,ប្រធានសាខា គណបក្សប្រជាជនកម្ពុជា ភ្នាក់ងារដឹកជញ្ជូនទេសចរណ៍ជលយាន ខេត្តព្រះសីហនុ ចំណុះគណៈកម្មាធិការគណបក្សប្រជាជនកម្ពុជាខេត្ដ,សមាជិក​យុវជន​គណបក្ស​ប្រជាជន​កម្ពុជា ខេត្ត​ព្រះសីហនុ និង ជាប្រធាន​ក្រុមមនុស្ស​ធ​ម៌​អូរ​បី (O3) ៕