ភ្នំពេញ៖ រដ្ឋាបាលរាជធានីភ្នំពេញ នាថ្ងៃទី៦ មេសា បានចេញនូវសេចក្ដីប្រកាសពីការរៀបចំសង្កា្រន្ត ដើម្បីចូលរួមអបអរសាទរក្នុងពិធីបុណ្យចូលឆ្នាំថ្មីប្រពៃណីជាតិខ្មែរ នៅរម្មណីយដ្ឋានវប្បធម៌ប្រវត្តិសាស្ត្រវត្តភ្នំ ក្នុងរាជធានីភ្នំពេញ។
ក្នុងឱកាសបុណ្យចូលឆ្នាំថ្មី ខាងមុខនេះ រដ្ឋាបាលរាជធានីភ្នំពេញ បានរៀបចំសង្ក្រាន្តវត្តភ្នំ ដើម្បីចូលរួមរក្សានូវទំនៀមទម្លាប់ ប្រពៃណី និងសិល្បៈវប្បធម៌របស់ជាតិ ដែលមាននូវពិធីបែបប្រពៃណីសាសនា កម្មវិធីកម្សាន្ត រួមមាន ពិធីទទួលទេវតាឆ្នាំថ្មី ពិធីគោរពទីទួលដូនពេញ ពិធីដង្ហែព្រះពុទ្ធរូប ពិធីពូនភ្នំខ្សាច់ ពិធីបុណ្យស្រង់ព្រះ ការសម្ដែងសិល្បៈរបាំត្រុដិ របាំបុរាណ និងលេងល្បែងប្រជាប្រិយជាតិ (ទាញ់ព្រ័ត្រ បោះអង្គញ់ វាយក្អម ចោលឈូង លាក់កន្សែង ដណ្ដើមស្លឹកឈើរ ចាប់កូនខ្លែង)។ បន្ថែមពីនេះ ក៏មានការប្រគុំតន្ត្រីបុរាណ-សម័យ និងការដាក់តាំងបង្ហាញ់នូវ គំនូរបុរាណ និងវត្ថុសិល្បៈវប្បធម៌ ផងដែរ។
គួរបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិខ្មែរ ចាប់ពីថៃទី ១៤ ដល់ថ្ងៃទី ១៦ មេសា ឆ្នាំ២០២៣ ដោយ«សង្ក្រាន្តវត្តភ្នំ»ចាប់ផ្ដើមរយៈពេល ៣ថ្ងៃ នៅរម្មណីយដ្ឋានវប្បធម៌ប្រវត្តិសាស្ត្រវត្តភ្នំ ក្នុងក្រុងភ្នំពេញ ខាងមុខនេះ៕
.jpg?1685612315)
