ខេត្តកំពង់ស្ពឺត្រៀមរៀប ចំការប្រណាំងរទេះសាឡីគោលឿន នាថ្ងៃទី០២ មេសា

ភ្នំពេញ៖ ក្រសួងវប្បធម៌នៃខេត្តកំពង់ស្ពឺ នាថ្ងៃទី២៨ មីនា បានសហការជាមួយ សហភាពសហព័ន្ធយុវជនកម្ពុជាខេត្តកំពង់ស្ពឺ រដ្ឋបាលក្រុងច្បារមន និងសមាគមគោលឿនខេត្តកំពង់ស្ពឺ រៀបចំព្រឹត្តិការណ៍ប្រណាំងរទេះសាឡីគោលឿននៅថ្ងៃទី០២មេសា នាពេលខាងមុខ។

ការរៀបចំព្រឹត្តិការណ៍នេះ ប្រព្រឹត្តទៅនៅលើដីឡូត៍លោកជំទាវ ជិន សុវណ្ណឌី សង្កាត់រការធំ ក្រុងច្បារមន តាមបណ្តោយផ្លូវជាតិលេខ៤ ត្រង់ចន្លោះបង្គោលគីឡូម៉ែត្រលេខ៤៣-៤៤ ទល់មុខស្ថានីយប្រេងឥន្ធនៈPTT។

សមាគមខេត្តកំពង់ស្ពឺ បានធ្វើការជួបជំដើម្បីណាត់គ្នាប្រណាំងរទេះសាឡីគោលឿន គឺជាការកម្សាន្តនាឳកាសមុនបុណ្យចូលឆ្នាំថ្មីប្រពៃណីខ្មែរ ហើយក៏មិនមានការលេងនូវការភ្នាល់អ្វីនោះទេ។ ប្រធានមន្ទីរវប្បធម៌ និងវិចិត្រសិល្បៈឲ្យចូលរួមលើកទឹកចិត្ត និងលើកកម្ពស់ដល់ប្រជាជនខេត្តកំពង់ស្ពឺ ដែលបានអភិរក្សនូវប្រពៃណីដ៏ល្អនៃការប្រណាំងរទេះសាឡីគោលឿននេះ គឺតាំងពីយូរលង់ណាស់មកហើយ។

គួរបញ្ជាក់ថា បន្ទាប់ពីអាក់ខាន ២ឆ្នាំ មន្ទីរវប្បធម៌ និងវិចិត្រសិល្បៈ បានសហការជាមួយសហភាពសហព័ន្ធយុវជនកម្ពុជា ខេត្តកំពង់ស្ពឺ និងសមាគមគោខេត្តកំពង់ស្ពឺ បានរៀបចំពិធីប្រណាំងរទេះសាឡីគោលឿនឡើងវិញ ដែលនឹងត្រូវប្រារព្ធធ្វើឡើង នៅភូមិដែកភ្លើង ឃុំរលាំងគ្រើល ស្រុកសំរោងទង ខេត្តកំពង់ស្ពឺ ដោយមានការចូលរួមពីប្រជាពលរដ្ឋច្រើនកុះករ៕