ភ្នំពេញ៖ រាជរដ្ឋាភិបាលកម្ពុជា បានសម្រេចផ្ដល់ការអនុគ្រោះដល់គ្រឹះស្ថានសិក្សារដ្ឋ និងឯកជនទូទាំងប្រទេស ឱ្យរួចផុតពីការបង់ពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល ពន្ធអប្បបរមា អាករលើតម្លៃបន្ថែម និងពន្ធកាត់ទុកលើសេវា ការប្រាក់ និងភាគលាភ ចាប់ពីឆ្នាំ២០២៤ រហូតដល់ដំណាច់ឆ្នាំ២០២៨។នេះបើយោងតាមលិខិតរបស់ទីស្ដីការគណៈរដ្ឋមន្ដ្រី។
ការសម្រេចរបស់រាជរដ្ឋាភិបាលកម្ពុជាពេលនេះ ធ្វើឡើងតាមអនុសាសន៍របស់ប្រមុខរាជរដ្ឋាភិបាលកម្ពុជាសម្តេច ហ៊ុន សែន តបនឹងសំណើរបស់សមាគម គ្រឹះស្ថានឧត្តមសិក្សាក្នុងជំនួបសម្តែងការគួរសម និងពិភាក្សាការងារនាព្រឹក ថ្ងៃទី០១ ខែកុម្ភៈ ឆ្នាំ២០២៣កន្លងទៅ។
តែយ៉ាងណាក៏ដោយ បើទោះបីផ្ដល់ការអនុគ្រោះដូចករណីខាងលើ គ្រឹះស្ថានសិក្សារដ្ឋ និងឯកជនទូទាំងប្រទេស ត្រូវបង់ពន្ធលើប្រាក់បៀវត្ស ពន្ធកាត់ទុកលើការជួលទីតាំងពន្ធអចលនទ្រព្យ និង ពន្ធប៉ាតង។
បើតាមសេចក្តីសម្រេចនោះ បានបញ្ជាក់បន្ថែមថា ក្នុងករណីខកខាន ឬយឺតយ៉ាវបំពេញកាតព្វកិច្ចសារពើពន្ធនានា គ្រឹះស្ថានសិក្សាត្រូវទទួលរងនូវទោសទណ្ឌនានា រួមមាន ប្រាក់ពិន័យ និងការប្រាក់ តាមបទប្បញ្ញត្តិស្ដីពន្ធដារជាធរមាន។បន្ថែមពីនេះ គ្រឹះស្ថានសិក្សាត្រូវបំពេញកាតព្វកិច្ចចុះបញ្ជីពន្ធដារ នៅរដ្ឋបាលសារពើពន្ធ កត់ត្រា និងកាន់កាប់បញ្ជិកាគណនេយ្យឱ្យបានត្រឹមត្រូវ ព្រមទាំងដាក់លិខិតប្រកាសពន្ធប្រចាំខែ និងពន្ធប្រចាំឆ្នាំតាមច្បាប់ជាធរមាន។
តាមរបាយការណ៍របស់ក្រសួងអប់រំ បានឲ្យដឹងថា គិតត្រឹមឆ្នាំ២០២២ គ្រឹះស្ថានឧត្តមសិក្សានៅទូទាំងប្រទេសមានចំនួន១៣០ ក្នុងនោះគ្រឹះស្ថានឧត្តមសិក្សារដ្ឋ៤៨ និងឯកជន៨២។ សាលាមត្តេយ្យសិក្សា និង សាលារៀនចំណេះទូទៅទាំងសាធារណៈ និងឯកជនមានចំនួនសរុប ១៨,៤៣០កន្លែង។ ក្នុងនោះមត្តេយ្យសិក្សាសហគមន៍ ៣,០៨៣កន្លែង, សាលារៀនសាធារណៈ ១៣,៦៨១កន្លែង និងសាលារៀនឯកជន ១,៦៦៦កន្លែង៕
