ភ្នំពេញ៖ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះអង្គសព្វព្រះរាជហឬទ័យប្រោសប្រទានព្រះរាជទ្រព្យចំនួន ១០,០០០ ដុល្លារអាមេរិក ដើម្បីរួមចំណែកកសាងព្រះពុទ្ធប្បដិមា កម្ពស់ ១០៨ ម៉ែត្រ នៅលើខ្នងភ្នំបូកគោ។ការចូលបច្ច័យនេះ ជាការរួមចំណែកដ៏សំខាន់សម្រាប់ចូលរួមជំរុញដល់វិស័យព្រះពុទ្ធសាសនា និង ការជំរុញវិស័យទេសចរណ៍លើខ្ទង់ភ្នំបូកគោ។
ពិធីប្រគល់រៀបចំឡើងក្រោមអធិបតីភាពរបស់សម្តេច គង់ សំអុល ឧបនាយកនាយករដ្ឋមន្ត្រី រដ្ឋមន្ដ្រីក្រសួងព្រះបរមរាជវាំង និង លោកជំទាវឧកញ៉ា សុខ ចន្ថា តំណាងអ្នកឧកញ៉ា សុខ គង់ ប្រធានក្រុមហ៊ុន សូគីម៉ិច គ្រុប។លោកជំទាវឧកញ៉ា សុខ ចន្ថាបានថ្លែងអំណរគុណដ៏ជ្រាលជ្រៅថ្វាយសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ដែលបានព្រះរាជទានថវិកានេះ។
គួរបញ្ជាក់ថា គម្រោងសាងសង់ព្រះពុទ្ធប្បដិមា កម្ពស់១០៨ម៉ែត្រ នៅលើខ្នងភ្នំបូកគោ ក្នុងឧទ្យានជាតិព្រះមុនីវង្ស “បូកគោ” ស្ថិតនៅក្រុងបូកគោ ខេត្តកំពត ដែលជាគម្រោងដ៏ធំមួយរបស់អ្នកឧកញ៉ា សុខ គង់ ប្រធានក្រុមហ៊ុន សុខា អូតែល។ ព្រះពុទ្ធបដិមានេះមានកំពស់១០៨ម៉ែត្រ ទ្រង់ភ្នែន ដែលកំពស់នេះ គិតចាប់តាំងពីបល្ល័ង្កខាងក្រោម រហូតដល់ចុងកេសារបស់ព្រះពុទ្ធបដិមា ក្រុមហ៊ុនគ្រោងនឹងចំណាយរយៈពេលសាងសង់ចំនួន ៤ឆ្នាំ និង ចំណាយប្រាក់ចន្លោះពី៣០លានដុល្លារ ទៅ៤០លានដុល្លារអាម៉េរិក។
