ភ្នំពេញ៖ ចាប់ពីថ្ងៃទី២-៨ ខែមករា ២០២៣ នៅទូទាំងប្រទេសកម្ពុជាទទួលបានភ្ញៀវសរុបមានចំនួន៤៥៩,៤០៩នាក់ ក្នុងនោះភ្ញៀវជាតិ៤១៥,៧៩៣នាក់ និងភ្ញៀវបរទេស៤៣,៦១៦នាក់។ ក្រសួងទេសចរណ៍បញ្ជាក់ថា ចំនួននេះអាចចាត់ទុកថាជាការចាប់ផ្តើមដ៏ល្អនៃចរន្តភ្ញៀវទេសចរផ្ទៃក្នុងសម្រាប់ឆ្នាំថ្មីនេះ ខណៈដែលអំឡុងពេលឆ្លងឆ្នាំសាកលកន្លងមកមានភ្ញៀវប្រមាណ២.០២លាននាក់ បានដើរកម្សាន្តទូទាំងប្រទេស។ នេះបើតាមរបាយការណ៍របស់ក្រសួងទេសចរណ៍។
បើតាមរបាយការណ៍ គោលដៅទេសចរណ៍សំខាន់ៗ រួមមាន៖ ខេត្តព្រះសីហនុ ២២៥,៦៥៩នាក់, ខេត្តសៀមរាប ៤៧,០៧០នាក់, រាជធានីភ្នំពេញ ៤១,៦៤៦នាក់, ខេត្តកំពត ៣០,៤០៨នាក់, ខេត្តកំពង់ចាម ១៦,២១៣នាក់, និង ខេត្តបាត់ដំបង ១៦,១៥៣នាក់៕
