ភ្នំពេញ៖ ធនាគារ អេស៊ីលីដា បានបើកសាខាថ្មីរបស់ខ្លួន នៅផ្សារទំនើបអ៊ីអនមានជ័យ(អ៉ីនអន ៣)ដែលនេះគឺជាសាខាទី ២៦៤របស់ធនាគារ នៅទូទាំងប្រទេសកម្ពុជា។សាខាថ្មីនេះ ធំទូលាយជាមួយនឹងការផ្តល់សេវារហ័ស ច្បាស់លាស់ និង ងាយស្រួលដល់អតិថិជន។លក្ខណៈពិសេសដើម្បីសម្រួលដល់អតិថិជនរបស់សាខាអ៊ីអនមានជ័យ គឺបើករាល់ថ្ងៃ ៧ថ្ងៃក្នុងមួយសប្តាស៍ ហើយសេវាកម្មបម្រើពីម៉ោង៩ព្រឹកដល់៧យប់។
អ្នកស្រី កែប ពិសី នាយិកាសាខាធនាគារអេស៊ីលីដា សាខាផ្សារទំនើបអ៊ីអនមានជ័យ បានឲ្យដឹងថា សាខាថ្មីនេះ មានសេវាដកដាក់ ផ្ទេរ បង់ពន្ធ និង មានសេវាធានារ៉ាប់រងនៅទីនេះទាំងអស់។សម្រាប់សាខាថ្មីនេះ ក៏មានផ្តល់ប្រឹក្សាទាក់ទងនឹងឥណទានជូនអតិថិជនផងដែរ។លក្ខណៈពិសេសដើម្បីសម្រួលដល់អតិថិជនរបស់សាខាអ៊ីអនមានជ័យ ដោយសារជាសាខានៅក្នុងផ្សារទំនើប គឺបើករាល់ថ្ងៃ ហើយសេវាកម្មបម្រើពីម៉ោង ៩ព្រឹកដល់៧យប់។ដូច្នេះអតិថិជនគឺមានភាពងាយស្រួល បានន័យថាថ្ងៃបុណ្យ ថ្ងៃឈប់សម្រាកសាធារណៈក៏អតិថិជនអាចអញ្ជើញមកបាន ពេលអតិថិជនទំនេរពីការងារពេលល្ងាចក៏អាចអញ្ជើញមកសាខានេះបាន។
ធនាគារអេស៊ីលីដា អតិថិជនសក្កាដានុពលកើនឡើងជារៀងរាល់ថ្ងៃ ហើយមូលហេតុដែលធនាគារពង្រីកសាខាថ្មីនេះ គឺតម្រូវការរបស់អតិថិជន ពោលកន្លែងណាមានភាពងាយស្រួល គឺត្រូវតែពង្រីកទៅដល់ទីនោះជូនអតិថិជន។នេះជាការលើកឡើងរបស់ អ្នកស្រី សុខ សោភា នាយិកាប្រតិបត្តិជាន់ខ្ពស់របស់ធនាគារអេស៊ីលីដា។
បើតាម អ្នកស្រី សុខ សោភា ធនាគារ អេស៊ីលីដា គ្រោងនឹងពង្រាយសាខានៅគ្រប់កន្លែងទាំងអស់ ខណៈដែលប្ចុប្បន្ន ធនាគារ មានអតិថិជនច្រើនរហូតដល់ជិត៤លាននាក់ ដូច្នេះធនាគារត្រូវធានាឲ្យបាននូវតម្រូវការរបស់អតិថិជន ដើម្បីមានភាពងាយស្រួលដល់អតិថិជន។ដោយសារសាខាធនាគារអេស៊ីលីដាមិនគ្រប់គ្រាន់ ទើប ACLEDA Mobile បំពេញតួនាទីបន្ថែមទៀត ដើម្បីធ្វើប្រតិបត្តិការធនាគារនៅគ្រប់ទីកន្លែង គ្រប់ពេលវេលាទៅតាមតម្រូវការរបស់អតិថិជន។
គួរបញ្ជាក់ថា នៅក្នុងឆ្នាំ ២០២២ ធនាគារ អេស៊ីលីដា ទទួលបានកំណើននៃការប្រើប្រាស់លើឌីជីថលកើនឡើង៨០% ទៅលើចំនួនសាច់លុយដែលធ្វើប្រតិបត្តិការលើឌីជីថល និង ៧៨% លើចំនួនប្រតិបត្តិការ។ នៅក្នុងឆ្នាំ២០២៣ ធនាគារអេស៊ីលីដា រំពឹងថា នឹងមានការកើនឡើងជាងឆ្នាំ២០២២ នៅលើទឹកប្រាក់លើសពី៨០% និង នៅលើចំនួនប្រតិបត្តិការលើសពី ៧៧% ដូច្នេះធនាគារសង្ឃឹមយ៉ាងមុតមាំថាអតិថិជនដ៏ឈ្លាសវៃ ឬសាធារណជនកំណើនកើនឡើងទ្វេដង ឬអាចកើនឡើង៣ដងក្នុងឆ្នាំ២០២៣៕
