ម្ចាស់ក្រុមហ៊ុនអាជីវកម្មបញ្ចាំអាចស្នើសុំបន្តសុពលភាពអាជ្ញាបណ្ណនិងបង់ថ្លៃអាជ្ញាបណ្ណប្រចាំឆ្នាំ

ភ្នំពេញ៖ និយ័តករអាជីវកម្មអចលនវត្ថុ និងបញ្ចាំ(ន.អ.ប.) នឹងដាក់ដំណើរការនីតិវិធីនៃការស្នើសុំបន្តសុពលភាពអាជ្ញាបណ្ណនិងបង់ថ្លៃអាជ្ញាបណ្ណប្រចាំឆ្នាំតាមប្រព័ន្ធបច្ចេកវិទ្យាព័ត៌មាន (CamD) សម្រាប់អាជ្ញាបណ្ណអាជីវកម្មបញ្ចាំ និងប្រាតិភោគដោយអនុប្បទាន ចាប់ពីថ្ងៃជូនដំណឹងនេះតទៅ។ នេះបើតាមសេចក្ដីជូនដំណឹងរបស់ ន.អ.ប. នៅថ្ងៃទី០៤ ខែមករា ឆ្នាំ២០២៣។

បើតាមសេចក្ដីជូនដំណឹង ដើម្បីសម្រួលដល់ការប្រកបអាជីវកម្មបញ្ចាំ និងប្រាតិភោគដោយអនុប្បទាន ន.អ.ប. បានអំពាវនាវដល់ម្ចាស់ក្រុមហ៊ុន សហគ្រាស ទាំងអស់ ត្រូវបំពេញកាតព្វកិច្ចដូចមានកំណត់ក្នុងប្រកាសលេខ០៣០ សហវ.ប្រកចុះថ្ងៃទី១៣ ខែមករា ឆ្នាំ២០១៧ ដោយត្រូវដាក់ពាក្យស្នើសុំបន្តសុពលភាពអាជ្ញាបណ្ណ និងបង់ថ្លៃអាជ្ញាបណ្ណប្រចាំឆ្នាំតាមប្រព័ន្ធបច្ចេកវិទ្យាព័ត៌មាន (CamDX) ដោយចូលទៅកាន់ https://nbfsa.registrationservices.gov.kh តាមរយៈApp៖ CamDigikey និងត្រូវបំពេញឯកសារក្នុងការស្នើសុំបន្តសុពលភាពដូចបានកំណត់នៅក្នុងប្រកាសលេខ ០៣០សហវ.ប្រក ចុះថ្ងៃទី១៣ ខែមករា ឆ្នាំ២០១៧ ស្តីពីការគ្រប់គ្រងអាជីវកម្មទទួលបញ្ចាំ និងទទួលប្រាតិភោគដោយអនុប្បទាន ករណីមានចម្ងល់ពាក់ព័ន្ធនឹងនីតិវិធីស្នើសុំខាងលើ សូមទំនាក់ទំនងដោយផ្ទាល់មកកាន់ ន.អ.ប.ដែលមានអាសយដ្ឋានស្ថិតនៅអគារ អ.ស.ហ.លេខ១៦៨F ជាន់ទី៧ ផ្លូវលេខ៥៩៨ សង្កាត់ច្រាំងចំរោះទី១ ខណ្ឌឫស្សីកែវ រាជធានីភ្នំពេញ រៀងរាល់ម៉ោងធ្វើការ៕