ចិន៖ នាយករដ្ឋមន្ត្រីចិន លោក Li Keqiang បានប្រកាសគាំទ្រការរៀនសូត្រទៅវិញទៅមកក្នុងចំណោមប្រជាជន និងកិច្ចសហប្រតិបត្តិការកាន់តែច្រើនជាមួយប្រទេសទាំងអស់ជាពិសេសការដាក់ភាសាចិនក្នុងគ្រឹះស្ថានអប់រំ ដើម្បីលើកកម្ពស់សន្តិភាព ស្ថិរភាព ការអភិវឌ្ឍន៍ និងវិបុលភាពក្នុងតំបន់ និងសកលលោក។
លោក Li បានទៅទស្សនាការតាំងពិព័រណ៍សមិទ្ធិផលនៃការផ្លាស់ប្តូរ និងកិច្ចសហប្រតិបត្តិការវប្បធម៌ចិន-កម្ពុជា ក្នុងរយៈពេល ៣០ ឆ្នាំកន្លងមក និងបានចូលរួមក្នុងពិធីប្រគល់គម្រោងជួសជុលប្រាសាទតាកែវ ដែលផ្តល់ជំនួយដោយប្រទេសចិន នៅរមណីយដ្ឋានប្រវត្តិសាស្ត្រអង្គរ អមដំណើរដោយឯកឧត្តម ជា សុផារ៉ា តំណាងពិសេសសម្តេចតេជោ ហ៊ុន សែន នាយករដ្ឋមន្ត្រីកម្ពុជា ។
លោក Li បាននិយាយថា ប្រទេសជាច្រើននៅបូព៌ា និងលោកខាងលិចបានចូលរួមយ៉ាងសកម្មក្នុងការការពារ និងជួសជុលរមណីយដ្ឋានប្រវត្តិសាស្ត្រអង្គរជាយូរណាស់មកហើយ។ លោក Li បាននិយាយថា វាជារឿងល្អសម្រាប់កម្ពុជា សម្រាប់មិត្តភាពចិន-កម្ពុជា និងសម្រាប់ការផ្លាស់ប្តូរវប្បធម៌ និងការរៀនសូត្រគ្នាទៅវិញទៅមកក្នុងចំណោមអរិយធម៌របស់មនុស្ស។
លោក Li ក៏បាននិយាយផងដែរថា ប្រទេសចិននៅតែប្តេជ្ញាចិត្តចំពោះគោលនយោបាយជាតិជាមូលដ្ឋាននៃការបើកចំហរ ហើយមានឆន្ទៈក្នុងការទាក់ទាញការបំផុសគំនិតពីសមិទ្ធិផលលេចធ្លោទាំងអស់នៃអរិយធម៌មនុស្ស និងអនុវត្តកិច្ចសហប្រតិបត្តិការជាក់ស្តែងជាមួយទាំងអស់គ្នា ដើម្បីបង្កើតចំណងមិត្តភាពដ៏រឹងមាំក្នុងចំណោមប្រជាជន ដើម្បីរួមចំណែកកសាងពិភពលោក។ លោកលី កត់សម្គាល់ឃើញថា កម្ពុជា និងចិនមានភាពស្និទ្ធស្នាលដូចបងប្អូន ហើយគោរព និងគាំទ្រគ្នាទៅវិញទៅមក។
ចំណែក ឯក ឧត្តម ជា សុផារ៉ា បានថ្លែងអំណរគុណចំពោះប្រទេសចិន ដែលបានផ្តល់ជំនួយដល់ការអភិវឌ្ឍន៍សេដ្ឋកិច្ច និងសង្គមរបស់កម្ពុជា ក៏ដូចជាមរតកវប្បធម៌ជាតិ។ ឯក ឧត្តម ក៏បានមានប្រសាសន៍ថា កម្ពុជាមានឆន្ទៈក្នុងការបន្តទំនាក់ទំនងមិត្តភាពជាប្រពៃណីជាមួយប្រទេសចិន បង្កើនការផ្លាស់ប្តូរប្រជាជន និងវប្បធម៌ និងជំរុញសមិទ្ធិផលថ្មីៗក្នុងទំនាក់ទំនងកម្ពុជា-ចិនបន្ថែមទៀតផង៕
