បាក់ស្ពានមួយនៅឥណ្ឌាបណ្តាលឲ្យមនុស្ស៦០នាក់ស្លាប់

ឥណ្ឌា៖ មនុស្សយ៉ាងហោចណាស់ ៦០ នាក់បានស្លាប់នៅក្នុងប្រទេសឥណ្ឌាកាលពីថ្ងៃអាទិត្យនៅពេលដែលស្ពានមួយបានដួលរលំនៅក្នុងរដ្ឋ Gujarat ភាគខាងលិច ដែលបណ្តាលឱ្យមនុស្សរាប់រយនាក់បានធ្លាក់ចូលទៅក្នុងទឹក។

រដ្ឋមន្ត្រីក្រសួងការងារ Gujrat លោក Brijesh Merja បាននិយាយថា ស្ពាននៅក្នុងទីក្រុង Morbi ត្រូវបានជួសជុលនាពេលថ្មីៗនេះ ហើយរដ្ឋាភិបាលនឹងស៊ើបអង្កេតពីរបៀប និងមូលហេតុដែលឧប្បត្តិហេតុនេះកើតឡើង។ លោកបានបន្ថែមថា ការផ្តោតសំខាន់នាពេលបច្ចុប្បន្នគឺលើប្រតិបត្តិការស្វែងរក និងសង្គ្រោះមនុស្ស។

បន្ថែមពីនេះកងទ័ពជើងទឹក និងទ័ពអាកាសរបស់ប្រទេសឥណ្ឌា កំពុងជួយក្នុងប្រតិបត្តិការស្វែងរក និងជួយសង្គ្រោះអ្នកដែលកំពុងរងគ្រោះ នេះបើយោងតាមប្រមុខរដ្ឋ Gujarat នៃប្រទេសឥណ្ឌា លោក Bhupendra Patel ។ លោក Patel បាននិយាយថា កងកម្លាំងប្រដាប់អាវុធនឹងកំពុងជួយដល់កងកម្លាំងឆ្លើយតបគ្រោះមហន្តរាយជាតិ (NDRF) និងកងកម្លាំងឆ្លើយតបគ្រោះមហន្តរាយរដ្ឋ (SDRF)។

រដ្ឋមន្ត្រីរដ្ឋ Gujarat លោក Merja បាននិយាយថា កងអនុសេនាតូចចំនួនបីនៃ NDRF បុគ្គលិកកងទ័ពជើងទឹកចំនួន ៥០ នាក់ បុគ្គលិកទ័ពអាកាសចំនួន ៣០ នាក់ បុគ្គលិកយោធាចំនួន ២នាក់ និងក្រុមពន្លត់អគ្គីភ័យចំនួន ៧ នាក់មកពី Rajkot, Jamnagar និង Diu ត្រូវបានដាក់ពង្រាយសម្រាប់កិច្ចខិតខំប្រឹងប្រែងជួយសង្គ្រោះ។

សម្រាប់មេដឹកនាំឥណ្ឌាលោក លោក Narendra Modi បានឱ្យដឹងថា ក្រុមគ្រួសារជនរងគ្រោះនឹងទទួលបានប្រាក់ពីមូលនិធិសង្គ្រោះជាតិរបស់នាយករដ្ឋមន្ត្រីឥណ្ឌា។ លោក Modi បានសរសេរនៅលើ Twitter ដោយនិយាយថា លោកមានការសោកស្ដាយជាខ្លាំងចំពោះសោកនាដកម្មនៅ Morbi ដោយនិយាយថា ប្រតិបត្តិការជួយសង្គ្រោះ និងសង្គ្រោះកំពុងបន្ត។ នាយករដ្ឋមន្រ្ដីរដ្ឋ Gujarat លោក Patel បាននិយាយថា លោកកំពុងធ្វើដំណើរទៅកាន់ទីក្រុង Morbi និងលុបចោលរាល់ព្រឹត្តិការណ៍ដែលបានគ្រោងទុកជាមុនសម្រាប់ថ្ងៃនោះ។

រដ្ឋមន្ត្រីក្រសួងមហាផ្ទៃ លោក Harsh Sanghavi បានគូសបញ្ជាក់ថាមនុស្សជាង ១៥០ នាក់បាននៅលើស្ពាន ដែលជាកន្លែងទាក់ទាញទេសចរណ៍ នៅពេលមានគ្រោះមហន្តរាយ។ ស្ពានប្រវែង ២៣០ ម៉ែត្រត្រូវបានសាងសង់ក្នុងសតវត្សទី ១៩ ហើយទើបតែបានបើកឱ្យប្រើប្រាស់ឡើងវិញកាលពីសប្តាហ៍មុនបន្ទាប់ពីការងារជួសជុល៕