សៀមរាប៖ អ្នកស្រី នួន និរតី ជាប្រជាពលរដ្ឋមួយរូបក្នុងចំណោមប្រជាពលរដ្ឋដទៃទៀត ដែលបានអញ្ជើញចូលរួមក្នុងពិធីសំណេះសំណាលជាមួយសម្តេច ហ៊ុន សែន នៅថ្ងៃទី ២២ តុលានេះ បានដាច់ចិត្តរត់ទៅរកសម្តេច ហ៊ុន សែន ដើម្បីស្នើសុំឱ្យជួយសង្គ្រោះកូនស្រី ដែលកំពុងមានជំងឺធ្ងន់ធ្ងរ។
លោកជំទាវ យក់ សម្បត្តិ រដ្ឋលេខាធិការ ក្រសួងសុខាភិបាល បានថ្លែងប្រាប់ សុីសុីថាមស៍ថា កូនស្រីមានឈ្មោះ ដន គ្រីស្ទីនរ៉ូសាណា ភេទស្រីអាយុ ៩ ឆ្នាំ ។កាលនៅអាយុ១ខែ ៣ថ្ងៃមានអាការមិនប្រក្រតី ម្តាយបាននាំទៅទទួលសេវាព្យាបាលនៅមន្ទីរពេទ្យគន្ធបុប្ផាសៀមរាប ដល់កុមារអាយុរហូតដល់ ២ឆ្នាំទើបទៅទទួលសេវាព្យាបាលនៅកុមារអង្គរ។
បើតាមលោកជំទាវ យក់ សម្បត្តិ បច្ចុប្បន្នកូនស្រីដែលមានជំងឺធ្ងន់ធ្ងរនេះ បានក្រុមគ្រូពេទ្យនៃក្រសួងសុខាភិបាល បញ្ជូនទៅកាន់រាជធានីភ្នំពេញហើយ ដើម្បីព្យាបាល។លោកជំទាវ បានប្ដេជ្ញាថា នឹងព្យាយាមធ្វើយ៉ាងណាព្យាបាលកូនស្រីនេះឲ្យមានភាពល្អប្រសើរឡើងវិញ។
គួរបញ្ជាក់ថា ហេតុការណ៍នេះ កើតឡើងក្នុងពិធីសំណេះសំណាលរវាងសម្តេច ហ៊ុន សែន នាយករដ្ឋមន្ត្រីកម្ពុជា ជាមួយប្រជាពលរដ្ឋស្ម័គ្រចិត្តរើលំនៅឋានចេញពីតំបន់រមណីយដ្ឋានអង្គរ ទៅកាន់តំបន់អភិវឌ្ឍន៍ពាក់ស្នែង នាព្រឹកថ្ងៃសៅរ៍ ទី២២ ខែតុលា ឆ្នាំ២០២២នេះ។
សម្តេច ហ៊ុន សែន បានឧបត្ថម្ភថវិកាប្រមាណ ៣ពាន់ដុល្លារ និង២លានរៀល ជូនអ្នកស្រី នួន និរតី សម្រាប់ដោះស្រាយការលំបាកក្នុងជីវភាព។
សម្តេច ហ៊ុន សែន ណែនាំឱ្យលោកស្រី យក់ សម្បត្តិ រដ្ឋលេខាធិការក្រសួងសុខាភិបាល ចាត់ចែងការព្យាបាលជូនកុមារីរូបនេះ ហើយសម្តេចរ៉ាប់រងរាល់ថ្លៃព្យាបាល៕
