វៀតណាម៖ ក្រសួងការបរទេសវៀតណាមបានណែនាំពលរដ្ឋវៀតណាមក្នុងប្រទេសអ៊ុយក្រែនឱ្យត្រៀមខ្លួនសម្រាប់ការជម្លៀសចេញពីទីក្រុងធំៗ ចំពេលមានការវិវឌ្ឍន៍នៃសង្គ្រាមដ៏ស្មុគស្មាញនៅក្នុងប្រទេសអ៊ុយក្រែន។
អ្នកនាំពាក្យក្រសួងការបរទេសវៀតណាមលោកស្រី Le Thi Thu Hang បាននិយាយនៅក្នុងសន្និសីទសារព័ត៌មានមួយថា ស្ថានទូតវៀតណាមប្រចាំនៅអ៊ុយក្រែនបានធ្វើការជាមួយអាជ្ញាធរមូលដ្ឋានដើម្បីរៀបចំជួយប្រជាពលរដ្ឋ និងអាជីវកម្ម ក៏ដូចជាការការពារទ្រព្យសម្បត្តិរបស់ពួកគេ ខណៈដែលជម្លោះនៅក្នុងប្រទេសកាន់តែស្មុគស្មាញ។ លោកស្រី Hang បន្តថា ប្រទេសវៀតណាមបានស្នើសុំប្រជាពលរដ្ឋរបស់ខ្លួននៅអ៊ុយក្រែនឱ្យ "រក្សាទំនាក់ទំនងជាមួយមនុស្សជាទីស្រឡាញ់របស់ពួកគេឱ្យបានញឹកញាប់ និងស្ថានទូត រៀបចំផែនការដើម្បីការពារខ្លួន និងក្រុមគ្រួសាររបស់ពួកគេ រួមទាំងការជម្លៀសចេញពីទីក្រុងធំៗ ឆ្ងាយពីតំបន់គ្រោះថ្នាក់"។
សម្រាប់អ្នកដែលនៅក្រៅអ៊ុយក្រែននៅពេលនេះ លោកស្រី Hang បាននិយាយថា ពួកគេមិនគួរមកប្រទេសនេះទេ លុះត្រាតែស្ថិតក្នុងស្ថានភាព "ចាំបាច់" ពិតប្រាកដ។ អ្នកស្រីបន្ថែមថា មានជនជាតិវៀតណាមប្រហែល ៥០០ នាក់កំពុងស្នាក់នៅប្រទេសអ៊ុយក្រែន ហើយមិនមានរបាយការណ៍ថាមានអ្នកស្លាប់ទេ។ លោកស្រីក៏ បានអំពាវនាវឱ្យភាគីពាក់ព័ន្ធក្នុងជម្លោះរុស្ស៊ី-អ៊ុយក្រែន ចាប់ផ្តើមការសន្ទនាឡើងវិញ និងដោះស្រាយបញ្ហានានាតាមរយៈវិធីសន្តិវិធីស្របតាមច្បាប់អន្តរជាតិ ជាពិសេសគោលការណ៍គោរពឯករាជ្យ អធិបតេយ្យភាព និងបូរណភាពទឹកដីរបស់ប្រទេស។
លោកស្រីបានបន្ថែមថា “យើងក៏សង្ឃឹមផងដែរថា ជីវិត និងទ្រព្យសម្បត្តិរបស់ប្រជាជនក្នុងប្រទេសអ៊ុយក្រែន រួមទាំងពលរដ្ឋវៀតណាម ត្រូវបានធានា”។ លោកស្រីសង្គត់ធ្ងន់ថា វៀតណាមមានឆន្ទៈក្នុងការរួមចំណែកក្នុងដំណើរការជំរុញការសន្ទនា និងស្វែងរកដំណោះស្រាយដើម្បីរក្សាស្ថិរភាពស្ថានភាព និងស្ថិរភាពក្នុងតំបន់ និងពិភពលោក។
គួរបញ្ជាក់ថាចាប់តាំងពីដើមខែនេះមក រុស្ស៊ីបានបញ្ជាឱ្យមានការវាយប្រហារបន្ថែមទៀតទៅលើទីបញ្ជាការយោធា ថាមពល និងហេដ្ឋារចនាសម្ព័ន្ធសព្វាវុធរបស់អ៊ុយក្រែន។ ការវាយប្រហារបានធ្វើឱ្យខូចខាតគ្រឿងបរិក្ខារថាមពលរបស់អ៊ុយក្រែនដល់ទៅ៣០%៕
