ភ្នំពេញ៖ ស្ដូបចំនួន៤ នៅក្នុងបរិវេណសារមន្ទីរ និងនៅដើមមហាវិថីមុនីវង្ស ត្រូវបានសាងសង់ឡើងដើម្បីរំលឹកវិញ្ញាណក្ខន្ធទាហានខ្មែរនិងបារាំងក្នុងសម័យសង្គ្រាមលោកលើកទី១។ ស្តូបទាំងនោះរួមមាន រូបដំរី តោ នាគ និងរូបដំរីចំនួនបួនឈរទ្រស្តូប។
រូបដំរី តោ នាគ នៅក្នុងបរិវេណសារមន្ទីរទាំងក្នុងសួនច្បារនិងសាលតាំង ជាបំណែកស្តូបធ្វើពីសំរឹទ្ធដែលត្រូវបានស្ថាបនាក្នុងឆ្នាំ១៩២៥ ដោយលោក ប៉ូល ឌុយគ័ង។ ចំណែកឯ រូបដំរីចំនួនបួនឈរទ្រស្តូប សម្រាប់ឧទ្ទិសដល់វិញ្ញាណក្ខន្ធយុទ្ធជនដែលស្លាប់ក្នុងសម័យសង្គ្រាមលោកលើកទី១ សង់នាឆ្នាំ១៩២៥ នៅសួនច្បារខាងជើងក្រុងភ្នំពេញ ហើយបច្ចុប្បន្នជាដើមមហាវិថីមុនីវង្ស។
រូបដំរីចំនួនបួនឈរទ្រស្តូប ត្រូវបានធ្វើពីសំរឹទ្ធនេះត្រូវបានបំផ្លាញដោយពួកខ្មែរក្រហម។ លុះក្រោយឆ្នាំ១៩៧៩ បំណែកស្ដូបនេះត្រូវបានផ្គុំឡើងវិញ ហើយសង្កេតឃើញថាខ្លួននៃស្តូបនេះ មានឆ្លាក់រូបព្រះបាទស៊ីសុវត្តិ ស្ត្រី និងកុមារក្នុងកាយវិការដង្ហែគ្រឿងដង្វាយទៅឧទ្ទិសដល់វិញ្ញាណក្ខន្ធអ្នកពលីជីវិត។
ដោយឡែករូបតោ និងនាគដែលលំអតួស្តូបជាក្បាច់រចនាតាមបែបបស្ចឹមប្រទេស។ នៅលើកំពូលស្ដូប មានឆ្លាក់រូបមនុស្សពីរនាក់ឈរតំណាងទាហានខ្មែរ និងបារាំងទទួលជ័យជម្នះដែលបានបាត់បង់ទៅហើយនាពេលបច្ចុប្បន្ននេះ។ ចំពោះឈ្មោះយុទ្ធជនចំនួន១៨៨រូប បានចារនៅលើផ្ទាំងថ្មសម្រាប់ការចងចាំក្នុងសួនច្បារនៃស្ថានទូតបារាំង៕
