កូរ៉េខាងជើង៖ «ការបាញ់មីស៊ីល»របស់ខ្លួនគឺប្រឆាំងនឹងការគំរាមគំហែងយោធារបស់អាម៉េរិក

ព្យុងយ៉ាង៖ កូរ៉េខាងជើងនាថ្ងៃសៅរ៌នេះបានអះអាងថា ការធ្វើតេស្តមីស៊ីលរបស់ខ្លួន គឺដើម្បីការពារខ្លួន ប្រឆាំងនឹងការគម្រាមកំហែងដោយយោធាផ្ទាល់របស់សហរដ្ឋអាម៉េរិក ហើយពួកគេមិនបានប៉ះពាល់ដល់សុវត្ថិភាពរបស់ប្រទេសជិតខាង និងតំបន់នោះទេ។ កូរ៉េខាងជើងបានបាញ់មីស៊ីលចំនួន៦គ្រាប់ក្នុងរយៈពេល១២ថ្ងៃគិតត្រឹមសប្តាហ៍នេះ រួមទាំងការបាញ់មីស៊ីលរយៈចម្ងាយមធ្យមពីលើប្រទេសជប៉ុនកាលពីថ្ងៃអង្គារ។

ប្រព័ន្ធផ្សព្វផ្សាយរដ្ឋ KCNA បាននិយាយដោយដកស្រង់សម្តីអ្នកនាំពាក្យរដ្ឋបាលអាកាសចរណ៍ថា "ការធ្វើតេស្តមីស៊ីលរបស់យើងគឺជាវិធានការការពារស្វ័យការពារធម្មតាមួយដែលបានគ្រោងទុកដើម្បីការពារសន្តិសុខរបស់ប្រទេស និងសន្តិភាពក្នុងតំបន់របស់យើងពីការគំរាមកំហែងដោយផ្ទាល់ពីយោធារបស់សហរដ្ឋអាមេរិក" ។ ការសាកល្បងកាំមីស៊ីល "មិនបានបង្កការគំរាមកំហែង ឬបង្កគ្រោះថ្នាក់ដល់សុវត្ថិភាពអាកាសចរណ៍ស៊ីវិល ក៏ដូចជាសុវត្ថិភាពនៃប្រទេសជិតខាង និងតំបន់នោះទេ ដោយការពិចារណាពេញលេញអំពីសុវត្ថិភាពអាកាសចរណ៍ស៊ីវិលជាមុន"។ ប្រព័ន្ធផ្សព្វផ្សាយនេះបន្តថា សារនេះគឺឆ្លើយតបទៅនឹងក្រុមប្រឹក្សាអង្គការអាកាសចរណ៍ស៊ីវិលអន្តរជាតិ ដែលថ្កោលទោសការបាញ់មីស៊ីលរបស់កូរ៉េខាងជើង សម្រាប់ការបង្កហានិភ័យសុវត្ថិភាពធ្ងន់ធ្ងរដល់អាកាសចរណ៍ស៊ីវិលអន្តរជាតិ។

ដោយឡែក ក្រសួងការពារជាតិរបស់ប្រទេសកូរ៉េខាងជើង "កំពុងសម្លឹងមើលយ៉ាងម៉ឺងម៉ាត់ចំពោះការអភិវឌ្ឍន៍នៃស្ថានភាពបច្ចុប្បន្ន ដែលគួរឱ្យព្រួយបារម្ភបំផុត" ទាក់ទងនឹងសមយុទ្ធរវាងសហរដ្ឋអាម៉េរិក និងកូរ៉េខាងត្បូង ដែលពាក់ព័ន្ធនឹងនាវាផ្ទុកយន្តហោះអាមេរិក USS Ronald Reagan ដែលដើរដោយថាមពលនុយក្លេអ៊ែរ។

សហរដ្ឋអាម៉េរិកក៏បានប្រកាសដាក់ទណ្ឌកម្មថ្មីផងដែរកាលពីថ្ងៃសុក្រ ដើម្បីជាការឆ្លើយតបទៅនឹងការបាញ់មីស៊ីលចុងក្រោយរបស់កូរ៉េខាងជើង៕