ប្រធាន​អាស៊ានជំរុញឱ្យសមាជិកដោះស្រាយ«ប្រេងឡើងថ្លៃ អត្រាអតិផរណាខ្ពស់»

សៀមរាប៖ ប្រធាន​ប្ដូរវេនអាស៊ាន នៅថ្ងៃទី ១៤ កញ្ញានេះ បានថ្លែងជំរុញដល់បណ្ដាប្រទេសក្នុងតំបន់ គិតគូរបន្ថែម និង រួមគ្នាជាធ្លុងមួយ ដើម្បីដោះស្រាយបញ្ហាប្រឈមជាសកលទាំងអស់គ្នា ជាពិសេស ជំរុញការស្ដារកំណើនសេដ្ឋកិច្ចឡើងវិញ​ប្រកបដោយ​ចីរភាព ខណៈ​ពិភព​លោកកំពុង​ជួប​វិបត្តិ​ប្រេងឡើងថ្លៃ អត្រាអតិផរណាខ្ពស់ ជំងឺឆ្លងរាតត្បាត និង បញ្ហាផ្សេងៗមួយចំនួន​ទៀត។ការថ្លែងនេះ ធ្វើឡើងក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និង កិច្ចប្រជុំពាក់ព័ន្ធ។

សម្តេច ហ៊ុន សែន នាយករដ្ឋមន្ត្រីនៃកម្ពុជា និង ជា​ប្រធាន​​​អាស៊ាន​ប្ដូរវេន បានថ្លែងថា កម្ពុជាបានកំណត់គោលដៅជាយុទ្ធសាស្ត្រចំនួន៤ នៅ​ក្រោមសរសរ​ស្ដម្ភសហគមន៍សេដ្ឋកិច្ចអាស៊ាន រួមមាន ការពង្រឹងការតភ្ជាប់ឌីជីថល វិទ្យាសាស្ត្រ និងបច្ចេកវិទ្យា, ការកាត់​បន្ថយ​គម្លាត​អភិវឌ្ឍន៍ ដើម្បីភាពប្រកួតប្រជែងរបស់អាស៊ាន, ជំរុញ​សមាហរណកម្ម, បរិយាបន្ន ភាពធន់ និង​ភាពប្រកួតប្រជែងអាស៊ានឱ្យខ្លាំងជាងមុន។

បើតាមសម្តេច ហ៊ុន សែន ពិភពលោក​កំពុងប្រឈមនឹង​ឧបសគ្គជាច្រើនក្នុងការភិវឌ្ឍដែលទាមទារឱ្យអាស៊ាន​ត្រូវ​ផ្តល់​សារសំខាន់​កាន់​តែខ្លាំងថែមទៀតដល់ការរក្សាឱ្យបាននូវប្រព័ន្ធពាណិជ្ជកម្ម ឈរលើវិធាន​ច្បាប់ គោល​ការណ៍​សកល​ភាវូបនីយកម្ម យន្តការពហុភាគី​និយម និងសេរី​ភាវូបនីយកម្ម ពាណិជ្ជកម្ម និងវិនិយោគ, ការប្រឆាំងនឹងការ​គាំពា​រ​និយម ការលើកកម្ពស់ភាពធន់រឹងមាំ និងចង្វាក់ផ្គត់ផ្គង់ដល់​តំបន់ និង​សកល, ការតភ្ជាប់ និងភស្តុភារកម្ម, កសាងសេដ្ឋកិច្ចឌីជីថល, កិច្ចការពារបរិស្ថាន, ការប្រើប្រាស់ថាមពលស្អាត និងការអភិវឌ្ឍប្រកបដោយចីរភាព និងការរក្សាសន្តិសុខស្បៀង និងការប្រយុទ្ធប្រឆាំងជំងឺកូវីដ-១៩ ជាដើម។

សម្តេចបានជំរុញ​ដល់​បណ្ដាប្រទេស​ក្នុង​តំបន់ គិត​គូរ​បន្ថែម និ​ងរួ​មគ្នា​ជា​ធ្លុងមួយ ដើម្បី​ឆ្លើយ​តប​ឱ្យ​បាន​ទាន់​ពេល​ទៅ​នឹងនិន្នាការថ្មីៗ និងដោះស្រាយបញ្ហាប្រឈមជាសកលទាំងអស់គ្នា ជាពិសេសជំរុញការស្ដារកំណើនសេដ្ឋកិច្ចឡើងវិញប្រកបដោយចីរភាព ខណៈពិភព​លោក​កំពុង​ជួប​វិបត្តិប្រេង​ឡើង​ថ្លៃ អត្រាអតិផរណាខ្ពស់ ជំងឺ​ឆ្លង​រាត​ត្បាត និងបញ្ហាផ្សេងៗមួយចំនួនទៀត។

សម្រាប់សម្តេច ហ៊ុន សែន អាស៊ាន​​គួរ​បន្តការភ្ជាប់ការទំនាក់ទំនងជាមួយដៃគូខាងក្រៅ ដោយឈរលើ​គោល​ការណ៍សម​ភាព និង​ការ​ផ្តល់​ផល​ប្រយោជន៍​គ្នា​ទៅ​វិញ​ទៅ​មក តាម​រយៈ​ការ​ទាញ​យក​ផលប្រយោជន៍ជាអតិបរមាសេដ្ឋ​កិច្ចព្រមព្រៀងពាណិជ្ជកម្មសេរីតំបន់ អាស៊ាន និងអាស៊ានបូកមួយ ដែលមានស្រាប់ ដោយមានការដំឡើង​កម្រតិបន្ថែម ជាពិសេសការអនុវត្តឱ្យបានពេញលេញ និងមានប្រសិទ្ធភាព នៃកិច្ចព្រមព្រៀងស្តីពីភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ដែលបានចូលជាធរមាន កាលពីថ្ងៃទី១ ខែមករា ឆ្នាំ២០២២កន្លងមកនេះ ទាក់ទិនការកេងយកអត្ថប្រយោជន៍អតិបរមាពីកិច្ចព្រមព្រៀងអាស៊ាន៕