ព្រះវិហារ៖ សហគមន៍កសិកម្មចំនួន ២១ ក្នុងខេត្តព្រះវិហារ បានបន្ដចុះកិច្ចសន្យាជាមួយក្រុមហ៊ុនអេមរុរ៉ាយស៍កម្ពុជា និងក្រុមហ៊ុនសាជីវកម្មសហគមន៍កសិកម្មកម្ពុជា (CACC) ដែលជាក្រុមហ៊ុននាំចេញ ស្ថិតក្នុងចំណោមក្រុមហ៊ុននាំចេញអង្ករ និងដំឡូងមីសរីរាង្គឈានមុខគេ នៅក្នុងប្រទេសកម្ពុជា ក្នុងការប្រមូលទិញកសិផលប្រមាណជាង៧៤,០០០តោនទៀតពីកសិករ។ ពិធីចុះហត្ថលេខាលើកិច្ចសន្យា នេះ ធ្វើឡើងកាលពីថ្ងៃទី៣១ សីហា។
ក្រុមហ៊ុននាំចេញស្រូវ និងដំឡូងមីសរីរាង្គ ទៅកាន់ទីផ្សារអ៉ឺរុប បានបន្ដចុះកិច្ចសន្យា ស្ដីពីការផលិត និងផ្គត់ផ្គង់ស្រូវ ដំឡូងមីសរីរាង្គ ជាមួយសហគមន៍កសិកម្មចំនួន ២១ ក្នុងការប្រមូលទិញកសិផលប្រមាណជាង៧៤,០០០តោនទៀតទិញកសិករខេត្តព្រះវិហារ ។
ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ បានមានប្រសាសន៍នៅក្នុងពិធីចុះហត្ថលេខានេះថា ពិធីចុះហត្ថលេខានេះបានបង្ហាញពីការធានាទីផ្សារស្រូវ និងដំឡូងមីសរីរាង្គរបស់កសិករ ក្នុងខេត្តព្រះវិហារដែលកំពុងផលិត ក្នុងឆ្នាំ២០២២ ហើយជាការផ្ដល់ឱកាសដល់ អ្នកចូលរួមទាំងអស់បានជួបមុខគ្នាក្នុងការបង្កើតទំនាក់ទំនង និងការចងបណ្ដាញរវាងអ្នកផលិត និងអ្នកទិញ(នាំចេញ) ព្រមទាំងដៃគូអភិវឌ្ឍន៍នានា ។
យោងតាមផែនការក្នុងឆ្នាំ២០២២ នេះ កិច្ចសន្យាផលិតកម្មកសិកម្មលើកសិផលសរីរាង្គសរុប ៧៤,០៩១ តោន ខណៈដែលនៅឆ្នាំ២០២១ កន្លងមកនេះ មានកសិផលសរុប ៣៤,៣៤៧តោន ត្រូវបានផលិត និងផ្គត់ផ្គង់តាមកិច្ចសន្យាពីកសិករប្រមាណជាង ៥,០០០ គ្រួសារ៕
