សៀមរាប៖ សមាគមទេសចរណ៍កម្ពុជា ហៅកាត់ថា CATA កាលពីរសៀលថ្ងៃទី១៩ ខែសីហា ឆ្នាំ២០២២នេះ បានរៀបចំពិធីប្រកាសជាផ្លូវការនូវវគ្គបណ្ដុះបណ្ដាលពង្រឹងជំនាញឡើងវិញដល់មគ្គុទ្ទេសក៍ទេសចរណ៍ បុគ្គលិកក្រុមហ៊ុន ទីភ្នាក់ងារទេសចរណ៍ និងផ្នែកបរិសណ្ឋារកិច្ច នៅខេត្តសៀមរាប ដែលក្នុងនោះមានសិក្ខាកាមចូលរៀនសរុប ១,១២៤នាក់។
តាមរបាយការណ៍របស់លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា កម្មវិធីបណ្តុះបណ្តាលនេះធ្វើឡើងដោយសង្កត់ធ្ងន់ទៅលើការពង្រឹងជំនាញដែលមានស្រាប់ និងរំលឹកឡើងវិញ សម្រាប់បុគ្គលិកកំពុងបម្រើការងារ ឬត្រូវបានបាត់បង់ការងារ ក្នុងវិស័យទេសចរណ៍ និងបដិសណ្ឋារកិច្ច ក្នុងសកម្មភាពស្តារវិស័យទេសចរណ៍ក្រោយវិបត្តិកូវីដ-១៩។ កម្មវិធីសិក្សា និងមេរៀនបណ្តុះបណ្តាលត្រូវបានរៀបចំឡើងដោយផ្អែកលើសមត្ថភាពនៃជំនាញនីមួយៗ សម្រាប់បុគ្គលិកបម្រើការផ្នែកសណ្ឋាគារ និងភោជនីយដ្ឋាន ចំនួន៧០០នាក់ ផ្នែកទីភ្នាក់ងារនិងការីទេសចរណ៍ ចំនួន១៧៥នាក់ និងផ្នែកមគ្គុទ្ទេសក៍ទេសចរណ៍ ចំនួន២០០នាក់។
លោកជំទាវ ឆាយ ស៊ីវលីន បានបន្តថា ដើម្បីធានាការបណ្តុះបណ្តាលជំនាញ គម្រោងបានធ្វើការ បណ្តុះបណ្តាលគ្រូបង្គោលចំនួន៤៩រូបដោយភ្នាក់ងារប្រឹក្សាយោលបល់ជំនាញទេសចរណ៍អេធីភី (ATP Consultant) ដើម្បីចូលរួមអនុវត្តន៍ការបណ្តុះបណ្តាលទៅកាន់សិក្ខាកាមជាង១ពាន់នាក់ ក្នុងរយៈពេលចាប់ពីខែសីហា ដល់ខែតុលាឆ្នាំ២០២២នេះ។
ក្នុងដំណើរជ្រើសរើសសិក្ខាកាម សមាគមទេសចរណ៍កម្ពុជា និងក្រុមការងារអនុវត្តគម្រោងបានរៀបចំសិក្ខាកាមផ្សព្វផ្សាយដំបូងនៅថ្ងៃទី២២ ខែកក្កដា ឆ្នាំ២០២២។ រហូតមកដល់ពេលនេះដំណើរការជ្រើសរើសសិក្ខាកាមចំនួន១០៧៥នាក់ ត្រូវបញ្ចប់ជាស្ថាពរទៅតាមចំនួនសិក្ខាកាមដែលបានគ្រោងទុក។ ហេតុដូចនេះ ការចាប់ផ្តើមដំណើរការអនុវត្តការបណ្តុះបណ្តាល នឹងធ្វើឡើងចាប់ពីថ្ងៃទី២២ ខែសីហា ឆ្នាំ២០២២ខាងមុខនេះ ក្នុងនោះការបណ្តុះបណ្តាលទៅកាន់បុគ្គលិកដែលបម្រើការក្នុងវិស័យទេសចរណ៍រួមមាន១០ផ្នែក, ផ្នែកទីភ្នាក់ងារ ១០ផ្នែក, ផ្នែកទីភ្នាក់ងារទេសចរណ៍ និងការីទេសចរណ៍ ផ្នែកមគ្គុទ្ទេសក៍ទេសចរណ៍ ផ្នែកជួរមុខ ផ្នែករៀបចំបន្ទប់ ផ្នែកបំរើម្ហូបអាហារ ផ្នែកចុងភៅ ផ្នែកធនធានមនុស្ស ផ្នែកលក់ និងទីផ្សារ ផ្នែកស្ប៉ា និង ផ្នែកវិស្វកម្ម។
លោកជំទាវ ឆាយ ស៊ីវលីន បានហៅសមិទ្ធិផលនៃកិច្ចសហប្រតិបត្តិការលើការជំរុញអភិវឌ្ឍន៍ធនធានមនុស្សក្នុងវិស័យទេសចរណ៍ និងបដិសណ្ឋារកិច្ច ក្នុងថ្ងៃនេះគឺជាជំហ៊ានថ្មីមួយទៀតនៃការសហការរួមគ្នាពីសមាគមទេសចរណ៍កម្ពុជា(CATA), ទីភ្នាក់ងារប្រឹក្សាយោបល់ជំនាញទេសចរណ៍អេធីភី (ATP Consultant) និង CHT ក្នុងការចូលរួមសម្រេចនូវផែនការស្តារ និងអភិវឌ្ឍវិស័យទេសចរណ៍ និងបដិសណ្ឋារកិច្ច ក្រោយវិបត្តិកូវីដ-១៩ តាមរយៈការបណ្តុះបណ្តាលពង្រឹងជំនាញដែលមានស្រាប់សម្រាប់ខេត្តសៀមរាប និងត្រៀមសម្រាប់ទទួលទេសចរឡើងវិញនាពេលខាងមុខ៕
