មីយ៉ាន់ម៉ា«គ្រោងពិចារណាទោស»លោកស្រីអ៊ុងសានស៊ូជីក្រោយលោកស្រីបានផ្តល់ចម្លើយជូនតុលាការ

យ៉ាំងហ្គោន៖ របបយោធាបើកចំហរក្នុងការចរចាជាមួយមេដឹកនាំដែលត្រូវបានបណ្តេញចេញពីអំណាចគឺលោកស្រី អ៊ុងសាន ស៊ូជី ដោយតុលាការមីយ៉ាន់ម៉ាគ្រោងនឹងពិចារណាទោសលោកស្រីសាឡើងវិញ។ នេះបើយោងតាមការចុះផ្សាយរបស់កាសែត មីយ៉ាន់ម៉ា។

ប្រធានរបបយោធាមីយ៉ាន់ម៉ាលោក មីន អ៊ុងឡាំង បាននិយាយនៅក្នុងសេចក្តីថ្លែងការណ៍មួយថា "បន្ទាប់ពីដំណើរការផ្លូវច្បាប់ប្រឆាំងនឹងលោកស្រីយោងទៅតាមច្បាប់ត្រូវបានបញ្ចប់ យើងនឹងពិចារណា (ការចរចា)ទោស ដោយផ្អែកលើការឆ្លើយតបអតីតមេដឹកនាំរូបនេះ"។

ដោយឡែកអ្នកសារព័ត៌មានត្រូវបានរារាំងពីដំណើរការនីតិវិធី មេធាវីរបស់លោកស្រីត្រូវបានហាមមិនឱ្យនិយាយទៅកាន់ប្រព័ន្ធផ្សព្វផ្សាយ ហើយរបបយោធាមិនបានផ្តល់ការចង្អុលបង្ហាញថានៅពេលណាដែលការកាត់ក្តីរបស់នាងអាចបញ្ចប់នោះទេ។ ប្រមុខរបបយោធាបាននិយាយថា ករណីរបស់របបយោធាប្រឆាំងនឹងលោកស្រី អ៊ុងសាន ស៊ូជី កំពុងដំណើរការទៅតាមច្បាប់។

លោកក៏បានលើកឡើងពីករណីរបស់ប្រធានាធិបតីកូរ៉េខាងត្បូងលោកស្រី Park Geun-hye ដែល "ក៏ត្រូវបានកាត់ទោសតាមច្បាប់" ពីបទពុករលួយក្នុងឆ្នាំ ២០១៨ ផងដែរ។ លោកអះអាងថា ក្រោយមក លោក Park ត្រូវបានលើកលែងទោស និងដោះលែង។ ការចោទប្រកាន់ផ្សេងទៀតប្រឆាំងនឹងលោកស្រី អ៊ុងសាន ស៊ូជី រួមមានការរាប់ចំនួនប្រាំពីរនៃអំពើពុករលួយ ការបំពានច្បាប់បោះឆ្នោត និងការបំពានច្បាប់សម្ងាត់ផ្លូវការនៃសម័យអាណានិគម ដែលលោកស្រីត្រូវបានចោទប្រកាន់រួមគ្នាជាមួយសេដ្ឋវិទូអូស្ត្រាលីលោក Sean Turnell ដែលជាប់ឃុំ។ អ្នកទាំងពីរអាចប្រឈមនឹងការជាប់ពន្ធនាគាររហូតដល់ ១៥ឆ្នាំ ប្រសិនបើរកឃើញថាមានកំហុសលើបទចោទនោះ។

លោក មីន អ៊ុងឡាំង បាននិយាយថា មានភស្តុតាងគ្រប់គ្រាន់ប្រឆាំងនឹងលោក Turnell សម្រាប់ "ការកាត់ទោសយ៉ាងធ្ងន់ធ្ងរ" ។ លោកបន្តថា របបយោធាអាចមានភាពធូរស្រាល ប្រសិនបើរដ្ឋាភិបាលអូស្ត្រាលី "ធ្វើសកម្មភាពវិជ្ជមាន" ចំពោះមីយ៉ាន់ម៉ា។

កាលពីខែកក្កដា អ្នកនាំពាក្យរបបយោធាបានប្រាប់ AFP ថា វាមិនអាចទៅរួចនោះទេ ដែលរបបនេះនឹងចូលទៅក្នុងកិច្ចសន្ទនាជាមួយលោកស្រី Aung San Suu Kyi ដើម្បីដោះស្រាយភាពចលាចលដែលបង្កឡើងដោយការដណ្តើមអំណាចរបស់យោធាកាលពីឆ្នាំមុន។

គួរបញ្ជាក់ថា លោកស្រី អ៊ុងសាន ស៊ូជី អាយុ ៧៧ ឆ្នាំ ត្រូវបានឃុំខ្លួន ចាប់តាំងពីឧត្តមសេនីយ៍បានផ្តួលរំលំរដ្ឋាភិបាលលោកស្រីក្នុងរដ្ឋប្រហារកាលពីថ្ងៃទី ១ ខែកុម្ភៈឆ្នាំមុន ហើយបានធ្វើឱ្យប្រទេសអាស៊ីអាគ្នេយ៍ធ្លាក់ចូលក្នុងភាពវឹកវរ។ លោកស្រីត្រូវបានជាប់ពន្ធនាគាររយៈពេល ១៧ ឆ្នាំសម្រាប់ការចោទប្រកាន់ និងប្រឈមមុខនឹងការជាប់ពន្ធនាគារជាច្រើនទស្សវត្ស ប្រសិនបើត្រូវបានកាត់ទោសលើការចោទប្រកាន់ផ្សេងទៀតដែលតុលាការមីយ៉ាន់ម៉ាកំពុងតែដំណើរការ៕