ការចរចាដោះស្រាយ«ប្រេងឆៅ»កម្ពុជាគ្រោងបញ្ចប់ក្នុងពេលឆាប់ៗនេះ

ភ្នំពេញ៖ ការចរចាស្វែងរកដំណោះស្រាយលើករណីប្រេងឆៅរបស់កម្ពុជា ចំនួនជិត ៣០ ម៉ឺនប៉ារ៉ែល ដែលនាវាឈ្មោះ MT Strovolos បានលួចដឹកចេញពីកម្ពុជា គ្រោងបញ្ចប់ក្នុងពេលឆាប់ៗនេះ ក្រោយភាគីពាក់ព័ន្ធ បានចូលតុពិភាក្សាចរចារគ្នា​ដើម្បី​សម្របសម្រួលលើផលប្រយោជន៍ដែលភាគីនីមួយៗទទួលបាន។

ឯកឧត្តម ជៀប សួរ អគ្គនាយកនៃអគ្គនាយកដ្ឋានប្រេងកាត និង ជាអ្នកនាំពាក្យក្រសួងរ៉ែ និង ថាមពល បានថ្លែងប្រាប់ស៊ីស៊ីថាមស៍ថា ការចរចាដោះស្រាយ«ប្រេងឆៅ»របស់ប្រទេសកម្ពុជា ភាគីពាក់ព័ន្ធបានឈានចូលដល់តុពិភាក្សាចរចារគ្នា ដើម្បីជជែកពីការបែងចែកផលប្រយោជន៍ដែលទទួលបានពីការលក់ប្រេងឆៅរបស់កម្ពុជា។

លោកថ្លែងថា "បញ្ហាគឺការបែងចែកផលប្រយោជន៍ដែលអាចលក់ប្រេងឆៅកម្ពុជាហើយ បែងចែកផលប្រយោជន៍ពីចំណូលប្រេងណឹងទៅតាមការព្រមព្រៀងគ្នា។ប៉ុន្តែអ្វីដែលខ្ញុំបានបញ្ជាក់នេះ វាគ្រាន់តែជាសញ្ញាវិជ្ជមាន តែការងារនេះមិនទាន់ចប់ហើយសុំឱ្យរង់ចាំការសម្រេចសិន"។

សូមបញ្ជាក់ថា ក្រុមហ៊ុន World Tankers Management Pte Ltd គឺជាអ្នកគ្រប់គ្រងនាវា MT Strovolos ដែលត្រូវបានជួលដោយក្រុមហ៊ុនមួយនៃ KrisEnergy Group ដើម្បីធ្វើជានាវាស្តុកទុក និងផ្ទេរប្រេងឆៅពីតំបន់អប្សរាប្លុក A ក្នុងដែនសមុទ្រកម្ពុជា។​​កាលពីខែមិថុនា ឆ្នាំ២០២១​ ​នាវា MT Strovolos ​បានលួចដឹកប្រេង​ទើបនឹងបូមប្រមាណ​ជិត៣០ម៉ឺនបារ៉ែលពីកម្ពុជា។​ប៉ុន្តែ ក្រុមហ៊ុន W​orld Tankers Management​ បានបដិសេធថា​ មិនបានលួចដឹក​ប្រេងរបស់កម្ពុជា​នោះទេ ព្រមទាំងទាមទារ​ឲ្យអាជ្ញាធរ​ឥណ្ឌូនេស៊ី​ដោះលែង​នាវិក​របស់ខ្លួនមកវិញ​។

បច្ចុប្បន្ននេះ ការអភិវឌ្ឍន៍​របស់​ក្រុមហ៊ុន KrisEnergy ​នៅប្លុកA ​កម្ពុជាបានបញ្ចប់កិច្ចព្រមព្រៀង​ជាមួយ​ក្រុមហ៊ុននេះ ហើយកំពុងពិភាក្សាការងារ​ជាមួយក្រុមហ៊ុនថ្មីមួយទៀតមកពីប្រទេសកាណាដា ដើម្បីចៀសវាងនូវ​កំហុស​ខុសឆ្លងដែលកើតមានឡើង។ ការសិក្សារបស់ក្រុមហ៊ុនថ្មីមួយនេះ ជិតដល់​ពេលវេលាមកពិភាក្សាគ្នាជាមួយក្រសួងហើយ ដោយការងារនេះក្រសួង​នឹង​បង្ហាញ​លទ្ធផលនៅពេលខាងមុខ៕