ទូតអាល្លឺម៉ង់បដិសេធទទួល«លិខិតឆ្លងដែន»វៀតណាមថ្មី

អាល្លឺម៉ង់៖ ស្ថានទូតអាល្លឺម៉ង់ប្រចាំនៅវៀតណាម មិនអនុម័តទិដ្ឋាការសម្រាប់ពលរដ្ឋវៀតណាម ដែលមានលិខិតឆ្លងដែនថ្មីទេ ដោយការបដិសេធនេះធ្វើឡើងបន្ទាប់ពីវៀតណាមបានរៀបចំលិខិតឆ្លងដែនថ្មី។ នេះបើយោងតាមកាសែតវៀតណាម VN Express បានចុះផ្សាយ។

ស្ថានទូតបានអះអាងនៅលើគេហទំព័រជាផ្លូវការរបស់ខ្លួនកាលពីថ្ងៃពុធថា ពលរដ្ឋវៀតណាមដែលមានលិខិតឆ្លងដែនថ្មីដែលមានគម្របពណ៌ខៀវខ្មៅជំនួសឱ្យពណ៌បៃតងចាស់នឹងមិនអាចស្នើសុំទិដ្ឋាការ C ឬ D ដើម្បីចូលប្រទេសអាល្លឺម៉ង់បានទេ។ សេចក្តីជូនដំណឹងបានបន្ថែមថា សូម្បីតែអ្នកដែលទទួលបានទិដ្ឋាការនៅក្នុងលិខិតឆ្លងដែនថ្មីរបស់ពួកគេ ក៏ត្រូវបានណែនាំមិនឱ្យហោះហើរទៅកាន់ប្រទេសអាល្លឺម៉ង់ដែរ។

ស្ថានទូតបាននិយាយថាបទប្បញ្ញត្តិទាំងនេះនឹងមានប្រសិទ្ធភាពរហូតដល់មានការជូនដំណឹងបន្ថែមទៀត។ តំណាងម្នាក់នៅនាយកដ្ឋានអន្តោប្រវេសន៍នៃក្រសួងសន្តិសុខសាធារណៈវៀតណាមបានប្រាប់ VnExpress ថាខ្លួនកំពុងធ្វើការជាមួយក្រសួងការបរទេសដើម្បីបំភ្លឺបញ្ហានេះ។ មន្ត្រីរូបនេះបានបដិសេធមិនបញ្ជាក់ថាតើហេតុផលមួយសម្រាប់ការបដិសេធទិដ្ឋាការនោះតែលោកសន្និដ្ឋានថាអាចមកពីកង្វះព័ត៌មានទីកន្លែងកំណើតនៅក្នុងលិខិតឆ្លងដែនថ្មី។

លិខិតឆ្លងដែនវៀតណាមថ្មីដែលមានការតុបតែងថ្មីត្រូវបានប្រើប្រាស់តាំងពីថ្ងៃទី ១ ខែកក្កដាឆ្នាំនេះ អ្នកដែលបំពេញនីតិវិធីចាំបាច់អាចរំពឹងថានឹងទទួលបានលិខិតឆ្លងដែនថ្មីរបស់ពួកគេក្នុងរយៈពេលមួយឬពីរសប្តាហ៍ខណៈលិខិតឆ្លងដែនចាស់នឹងបន្តរហូតដល់ផុតកំណត់៕