ទីម័រខាងកើតចង់ក្លាយជា«សមាជិកថ្មីនៃអាស៊ាន»នៅឆ្នាំក្រោយ

ទីម័រ៖ ប្រធានាធិបតីទីម័រខាងកើតលោក José Ramos Horta បានថ្លែងអំឡុងដំណើរទស្សនកិច្ចរបស់លោកទៅកាន់ប្រទេសឥណ្ឌូនេស៊ីកាលពីថ្ងៃទី១៩ ថា ប្រទេសទីម័រខាងកើតសង្ឃឹមថានឹងចូលរួមជាមួយសមាគមប្រជាជាតិអាស៊ីអាគ្នេយ៍(អាស៊ាន) នៅឆ្នាំក្រោយនេះ។

ប្រធានាធិបតីឥណ្ឌូនេស៊ីលោក Joko Widodo បានទទួលលោក Horta នៅវិមាន Bogor នៅជាយភាគខាងត្បូងនៃរដ្ឋធានី ហ្សាកាតា ហើយអ្នកទាំងពីរបានធ្វើសន្និសីទសារព័ត៌មានរួមគ្នា។

លោក Horta បាននិយាយថា ទីម័រ គឺជាផ្នែកមួយនៃអាស៊ីអាគ្នេយ៍ ហើយបានបំពេញគ្រប់តម្រូវការសម្រាប់ការចូលជាសមាជិកអាស៊ាន។ លោករំពឹងថា ឥណ្ឌូនេស៊ី នឹងដើរតួយ៉ាងសំខាន់ក្នុងការជំរុញ ទីម័រ ឱ្យចូលរួមជាមួយអង្គការក្នុងតំបន់នេះ នៅពេលដែលឥណ្ឌូនេស៊ីកាន់តំណែងជាប្រធានប្តូរវេនអាស៊ាន។

ទីម័រខាងកើតមានទីតាំងនៅភាគខាងកើតបំផុតនៃកោះ Nusa Tenggara នៅអាស៊ីអាគ្នេយ៍ ប្រទេសនេះធ្លាប់ជាអាណានិគមព័រទុយហ្គាល់ ហើយត្រូវបានបញ្ចូលទៅក្នុងទឹកដីឥណ្ឌូនេស៊ីក្នុងទសវត្សរ៍ឆ្នាំ ១៩៧០ តែបានប្រកាសឯករាជ្យនៅថ្ងៃទី ២០ ខែឧសភា ឆ្នាំ ២០០២ ធ្វើឲ្យប្រទេសនេះ ក្លាយជា "ប្រទេសក្មេងជាងគេ" នៅអាស៊ី។

ប្រទេសទីម័រខាងកើតបានដាក់ពាក្យចូលជាសមាជិកអាស៊ានក្នុងឆ្នាំ ២០១១ ហើយបច្ចុប្បន្នជាអ្នកសង្កេតការណ៍អាស៊ាន។ ក្នុងដំណើរបំពេញទស្សនកិច្ចនៅប្រទេសឥណ្ឌូនេស៊ី លោក Horta នឹងជួបជាមួយអគ្គលេខាធិការអាស៊ាន Lim Ngok Hui ហើយអ្នកទាំងពីរនឹងពិភាក្សាអំពីបញ្ហាក្នុងតំបន់ និងការចូលរួមរបស់ទីម័រខាងកើតក្នុងអាស៊ាន។

បច្ចុប្បន្ន អាស៊ានគឺជាប្រទេសដែលមានសេដ្ឋកិច្ចធំជាងគេទី ៥ នៅលើពិភពលោក។ សមាជិករបស់ខ្លួនរួមមានប្រទេសអាស៊ីអាគ្នេយ៍ចំនួន ១០ រួមមាន ឥណ្ឌូនេស៊ី សិង្ហបុរី ភីលីពីន កម្ពុជា ឡាវ វៀតណាម ម៉ាឡេស៊ី មីយ៉ាន់ម៉ា ប្រ៊ុយណេ និងថៃ ដែលមានប្រជាជនប្រមាណ ៦៦០ លាននាក់៕