នាយករដ្ឋមន្ត្រីអង់គ្លេសលោក Boris Johnson បានលាលែងពីតំណែង

អង់គ្លេស៖ នាយករដ្ឋមន្ត្រីអង់គ្លេសលោក Boris Johnson នឹងប្រកាសលាលែងពីតំណែងជាមេដឹកនាំគណបក្សអភិរក្សនៅថ្ងៃទី៧ កក្កដា ប៉ុន្តែនឹងបន្តធ្វើជានាយករដ្ឋមន្ត្រីរហូតដល់រដូវស្លឹកឈើជ្រុះ។ នេះបើតាមប្រព័ន្ធផ្សព្វផ្សាយរបស់ចក្រភពអង់គ្លេសរួមទាំង BBC បានរាយការណ៍។

ការចាកចេញរបស់លោក Johnson កើតឡើងជុំវិញបញ្ហាដឹកនាំនិងរងគ្រោះដោយរឿងអាស្រូវរបស់លោក។ ខណៈចំនួននៃការលាលែងពីតំណែងពីរដ្ឋាភិបាលរបស់លោកមានលើសពី ៥០ នាក់គិតត្រឹមព្រឹកថ្ងៃទី៧ នេះបើយោងតាមចំនួនសរុបដោយប្រព័ន្ធផ្សព្វផ្សាយអង់គ្លេស។

របាយការណ៍បាននិយាយថា ការដឹកនាំបែបអភិរក្សនឹងប្រព្រឹត្តទៅនៅរដូវក្តៅនេះ ហើយនាយករដ្ឋមន្ត្រីថ្មី នឹងចូលកាន់តំណែងក្នុងសន្និសីទគណបក្ស Tory ក្នុងខែតុលា។

មន្រ្តីរដ្ឋាភិបាលដូចជា លោក Sajid Javid និង លោក Rishi Sunak បានលាលែងពីតំណែង ក្នុងការតវ៉ាប្រឆាំងនឹងការដឹកនាំរបស់លោក Johnson ។ ដោយលោក Javid បាននិយាយថា «គាត់មិនអាចបន្តបម្រើក្នុងរដ្ឋាភិបាលនេះទៀតបានទេ» ។

ទន្ទឹមនឹងនេះ លេខាធិការអៀរឡង់ខាងជើង លោក Brandon Lewis ក៏ត្រូវបានគេរាយការណ៍ថា នឹងលាលែងពីតំណែងកាលពីថ្ងៃព្រហស្បតិ៍ផងដែរ។

ពីមុនលោក Johnson បានប្តេជ្ញាបន្តកាន់អំណាច ប៉ុន្តែឥឡូវនេះលោកបានសម្រេចចិត្តចុះចេញពីតំណែង។ ខណៈដែលចំនួនមន្រ្តីអង់គ្លេសបានលាឈប់ជាបន្តបន្ទាប់ ហើយរិះគន់ពីភាពអសមត្ថភាពរបស់រដ្ឋាភិបាល៕