រដូវភ្លៀងធ្លាក់បានធ្វើឱ្យកម្ពុជាធ្លាក់ចុះភ្ញៀវទេសចរជាង៦ភាគរយនៅចុងសប្ដាហ៍ទី១ខែកក្កដានេះ

ភ្នំពេញ៖ ស្ថានភាពភ្ញៀវទេសចរផ្ទៃក្នុងប្រចាំសប្តាហ៍ថ្ងៃទី០២-០៣ ខែកក្កដា ឆ្នាំ២០២២ ភ្ញៀវសរុបមានចំនួន ២៩៧,៤០២នាក់ ក្នុងនោះភ្ញៀវជាតិ ២៧៨,៦៨១នាក់ និងភ្ញៀវបរទេសផ្ទៃក្នុង ១៨,៧២១នាក់។ តួលេខនេះមានការថមថយប្រមាណ ៦,៧៣% ធៀបនឹងចុងសប្តាហ៍កន្លងមក ដែលនៅរដូវភ្លៀង ចលនាទេសចរផ្ទៃក្នុងតែងមានការថមថយជាធម្មតា។ នេះបើតាមរបាយការណ៍របស់ក្រសួងទេសចរណ៍នៅថ្ងៃទី០៤ ខែកក្កដា ឆ្នាំ២០២២។

បើតាមរបាយការណ៍ គោលដៅទេសចរណ៍នៃខេត្តព្រះសីហនុ នៅតែជាគោលដៅពេញនិយមដែលទទួលបានភ្ញៀវទេសចរផ្ទៃក្នុងច្រើនជាងគេ ខណៈខេត្តសៀមរាប ក៏បានទទួលភ្ញៀវទេសចរច្រើនផងដែរបន្ទាប់ពីមានបើកដំណើរការរមណីយដ្ឋានសំខាន់មួយចំនួន និងការតភ្ជាប់ជើងហោះហើរតាមផ្លូវអាកាសជាបន្តបន្ទាប់។

ក្នុងនោះ គោលដៅទេសចរណ៍សំខាន់ៗ រួមមាន៖ ខេត្តព្រះសីហនុ ៥៤.៦០៨ នាក់, ខេត្តសៀមរាប ៤៦.៦២០ នាក់, ខេត្តបាត់ដំបង ៤០.៤១៩ នាក់, ខេត្តកំពត ៣៩.៨៧៩ នាក់, ខេត្តកែប ១៦.១៨៧ នាក់, រាជធានីភ្នំពេញ ១៥.៦៥៣ នាក់, ខេត្តពោធិ៍សាត់ ១២.៧៦៩ នាក់ និងខេត្តកំពង់ស្ពឺ ១១.០៩៧ នាក់៕